خدشہ ہے یاسین ملک کو شہید کردیا جائے گا، وزیر خارجہ کا اقوام متحدہ کو خط

خدشہ ہے یاسین ملک کو دوران حراست شہید کردیا جائے گا، وزیر خارجہ بلاول بھٹو زرداری نے یاسین ملک کی سزا کے خلاف اقوام متحدہ کو خط لکھ دیا۔

بلاول بھٹو نے اپنے خط میں کہا کہ یاسین ملک کے خلاف بھارتی الزامات بے بنیاد ہیں، آزادی کی جدوجہد کو دہشت گردی قرار دینے کی کوشش کی جارہی ہے۔

انہوں نے اقوام متحدہ کے سیکریٹری جنرل سے مسئلہ کشمیر کے پرامن حل کے لیے کردار ادا کرنے کا مطالبہ کیا۔

وزیر خارجہ نے خط میں یاسین ملک کے خلاف مقدمے کو سیاسی قرار دیا، انہوں نے کہا کہ یاسین ملک کے خلاف بھارتی الزامات بے بنیاد ہیں۔

جموں کشمیر لبریشن فرنٹ کا کہنا ہے کہ بھارت یاسین ملک ذہنی تشدد کا نشانہ بنا کر نفسیاتی مریض بنانا چاہتا ہے۔

ان کا کہنا تھا کہ یاسین ملک سے ناروا سلوک سے عالمی قوانین کی دھجیاں اڑائی گئیں، بھارتی جیلوں میں یاسین ملک کے ساتھ ناروا سلوک کیا جارہا ہے۔

اقوام متحدہ کے سیکریٹری جنرل کو تحریر کردہ خط میں بلاول بھٹو نے خدشہ ظاہر کیا کہ یاسین ملک کو دوران حراست شہید کردیا جائے گا۔

انہوں نے مزید کہا کہ اقوام متحدہ بھارت پر زور دے کہ بے بنیاد الزامات میں قید تمام کشمیری رہنماؤں کو رہا کیا جائے۔

بشکریہ جنگ