حقیقت سے قریب ترین قرار دی جانے والی آئل پینٹنگ

پینٹنگز حقیقی خوبصورت نظاروں کو قید کرلینے کا ایک فن ہے جسے متعدد افراد بڑے شوق سے سیکھتے اور بناتے ہیں۔

پینٹنگ آرٹ کو ایک مکمل شعبے کی سی اہمیت حاصل ہے، پینٹنگز متعدد طریقوں سے کی جاتی ہے اور ان فن پاروں اور شاہکاروں کی قدر  فن سے لگاؤ رکھنے والے ہی جانتے ہیں۔

دنیا میں کئی فنکاروں نے اس فن کے ذریعے نام کمایا ہے، اس فن کی دنیا سے ایسا ہی ایک نام چین کے بااثر فنکار لینگ جون کا ہے۔

لینگ جون کی جانب سے بنائی گئی ایک چینی خاتون کی آئل پینٹنگ کو دنیا بھر میں شہرت حاصل ہے جس کی وجہ اس پینٹنگ کا حقیقت سے قریب تر ہونا ہے۔

اس پینٹنگ کو متعدد ماہرین کی جانب سے ’میگنی فائنگ گلاس‘ (magnifying glass) کے ذریعے بھی جانچا جا چکا ہے مگر اس پینٹنگ میں کہیں کسی بھی ماہر کو کوئی جھول، غلطی یا کمی نظر نہیں آئی ہے۔

اسی لیے اسے دنیا کی بہترین اور حقیقت سے قریب ترین آئل پینٹنگ ہونے کا اعزاز حاصل ہے۔

اس پینٹنگ کے خالق لینگ جون حقیقت سے قریب ترین پینٹنگز بنانے کے سبب کافی شہرت رکھتے ہیں، لینگ جون کو ایسی پینٹنگ بنانے میں آدھے دن سے لے کر ایک ماہ تک کا وقت درکار ہوتا ہے۔

بشکریہ جنگ