جہاز پرانی جگہ سے ہزار فٹ سمندر کی طرف آگیا

کراچی میں کلفٹن کے قریب سمندر کے کنارےریت میں پھنسے بحری جہاز ’ہینگ ٹونگ 77‘ کو نکالنے کے لئے آپریشن آج پھر شروع کر دیا گیا ہے، جہاز ہزار فٹ سمندر کی جانب آگیا ہے تاہم سمندر میں شدید موسم کی خرابی ریسکیو آپریشن میں رکاوٹ کا سبب بن رہی ہے۔

گڈانی کی ایان شپ بریکنگ کمپنی فلوٹنگ ’’باج‘‘ کی مدد سے جہاز نکالنے کیلئے سرگرم ، ’’باج‘‘ کھلے سمندر میں ہینگ ٹونگ 77 سے 1000 میٹر کے فاصلے پر موجود ہے۔

ریسکیو آپریشن کے انچارج کے مطابق تیز سمندری لہریں مکمل رفتار سے باج اور ہیوی کرین سے ٹکرا رہی ہیں تاہم کمپنی کی جانب سے جہاز کو نکالنے کی کوششیں جاری ہیں۔

کراچی میں کلفٹن کے قریب سمندر کے کنارے پھنسے بحری جہاز کو نکالنے کا آپریشن آج ایک ماہ بعد سودمند رہا ہے

انہوں نے بتایا کہ پیر کو کوشش کے دوران جہاز پرانی جگہ سے 1000 فٹ سمندر کی طرف آگیا تھا، جہاز کا رخ بھی تبدیل کرکے سمندر کی طرف کردیا گیا تھا مگر سمندری مد و جزر کی وجہ سے پیر کو آپریشن روکنا پڑا تھا۔

واضح رہے کہ جہاز پھنسے ایک ماہ گزر جانے کے بعد گزشتہ روز اس کو نکالنے کا آپریشن سودمند رہا، جہاز کے انجن بھی اسٹارٹ ہوگئے اور توقع کی گئی ہےکہ جہاز آج (منگل) کی دوپہر تک مکمل طور پر نکال لیا جائے گا۔

ریسکیو آپریشن میں سرگرم گڈانی کی شپ بریکنگ کمپنی کے ذرائع کے مطابق فلوٹنگ ’باج‘ استعمال کیا جارہا ہے یہ ’باج‘ کھلے سمندر میں ہینگ ٹونگ 77 سے ہزار میٹر کے فاصلے پر موجود ہے جس پر ہیوی کرین نصب کی گئی ہے۔

بشکریہ جنگ