جنگ بندی ختم ہوتے ہی اسرائیلی دہشتگردی شروع، بچوں سمیت 109 فلسطینی شہید

مقبوضہ بیت المقدس: حماس اور اسرائیل کے درمیان معاہدے کے تحت  ہونے والی جنگ بندی ختم ہوتے ہی صہیونی فوج نے دہشت گردی کا سلسلہ ایک بار پھر شروع کردیا، جس میں بچوں سمیت 109 فلسطینی شہید ہو گئے۔

بین الاقوامی خبر رساں اداروں کے مطابق 24 نومبر سے شروع ہونے والی جنگ بندی کے بعد قابض اسرائیلی فوج نے غزہ پر ایک بار پھر وحشیانہ بمباری کا آغاز کردیا۔ فلسطینی وزارت داخلہ نے تصدیق کی ہے کہ اسرائیلی طیاروں نے غزہ پر فضائی حملے ایک بار پھر شروع کردیے ہیں۔

عرب میڈیا کے مطابق صہیونی فوج کی جاب سے غزہ کے علاوہ خان یونس کے مشرقی علاقوں میں بھی بم باری کی جا رہی ہے۔ علاوہ ازیں مغربی غزہ پہلے ہی سے بمباری کا نشانہ بن رہا ہے جب کہ اسرائیلی جاسوس طیاروں کی نچلی سطح پر پروازوں کا سلسلہ بھی جاری ہے۔

قابض اسرائیلی فوج نے غزہ کے شمالی علاقے جبالیہ  میں ایک بار پھر ایک گھر کو اپنے حملے میں نشانہ بنایا ہے جب کہ مختلف علاقوں میں حماس مجاہدین اور فلسطینی نوجوانوں کے ساتھ شدید جھڑپوں کی بھی اطلاعات ہیں۔

فلسطینی وزارت صحت کی جانب سے اسرائیلی فضائیہ کی غزہ پر جارحیت میں کم از کم 109 شہریوں کے شہید ہونے کی تصدیق کردی گئی ہے، جس میں بچے بھی شامل ہیں۔

واضح رہے کہ جنگ بندی سے قبل بھی غزہ پر اسرائیلی جارحیت میں شہید ہونے والوں کی تعداد تقریباً 15 ہزار ہو چکی تھی  جن میں خواتین و بچوں کی بڑی تعداد شامل ہے۔ علاوہ ازیں زخمیوں کی تعدادہزاروں اور تباہی سے بے گھر ہونے والوں کی تعداد  لاکھوں میں ہے۔

دوسری جانب قطر کا کہنا ہے کہ جنگ بندی معاہدہ جاری رکھنے کے سلسلے میں بات چیت جاری ہے۔ وزارت خارجہ نے اپنے بیان میں کہا کہ جنگ بندی میں توسیع نہ ہونے پر اسرائیل کی جانب سے ایک بار پھر بمباری کردینا انتہائی افسوسناک ہے۔ فریقین میں جنگ  بندی کے لیے مذاکرات جاری ہیں۔

 

Statement |Qatar expresses its deep regret at the resumption of the Israeli aggression against Gaza following the end of the humanitarian pause #MOFAQatar pic.twitter.com/4C2ckADDtO

— Ministry of Foreign Affairs – Qatar (@MofaQatar_EN) December 1, 2023

اُدھر صہیونی ریاست نے جنگ بندی ختم ہونے کے بعد بمباری اور بڑی تعداد میں فلسطینیوں کی شہادت پر من گھڑت جواز بناتے ہوئے کہا ہے کہ حماس کی جانب سے معاہدے کے مطابق مزید یرغمالیوں کو رہا نہیں کیا گیا، جب کہ حماس نے اسرائیل پر راکٹ بھی داغے ہیں۔ اسرائیلی میڈیا نے روایتی بددیانتی کا مظاہرہ کرتے ہوئے کہا ہے کہ جمعے کی صبح غزہ سے ایک راکٹ فائر کیا گیا تھا۔

 

Hamas violated the operational pause, and in addition, fired toward Israeli territory.

The IDF has resumed combat against the Hamas terrorist organization in Gaza. pic.twitter.com/gVRpctD79R

— Israel Defense Forces (@IDF) December 1, 2023