جب شاہین انجرڈ ہوئے تو اندازہ تھا کہ اب ایک بڑا اوور لینا ہے، معین علی

انگلینڈ کرکٹ ٹیم  کے آل راؤنڈر معین علی کا کہنا ہے کہ ٹی ٹوئنٹی ورلڈکپ کے فائنل میں جب شاہین انجرڈ ہوئے تواندازہ تھا کہ اب ایک بڑا اوور لینا ہے، پاکستان کی بولنگ اور وکٹ کو دیکھ کر اندازہ تھا کہ ہمیں چیلنج ملے گا۔

ورلڈکپ کے فائنل میں پاکستان نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 137 رنز بنائے۔

میلبرن میں میڈیا سے گفتگو کرتے ہوئے معین علی نے کہا کہ سوچا تھا پاکستان کو 160 سے زیادہ رنز نہیں کرنے دینا، مگر ہمارے بولرز نے کافی اچھا پرفارم کیا۔

معین علی  نے کہا کہ پاکستان کے ساتھ حال ہی میں بہت کرکٹ کھیلی جس سے حریف کا اندازہ تھا، جب آپ ایک حریف کے ساتھ زیادہ کھیلتے ہیں تو معلوم ہوتا ہے کہ کیسے مقابلہ کرنا ہے۔

انہوں نے کہا کہ پاکستان میں اچھا کھیل کر آئے تھے جس کا اعتماد تھا، زیادہ کھیل کر حریف کی حکمت عملی کا خوف نہیں رہتا۔

معین علی نے کہا کہ پاکستان اور بھارت آپس میں زیادہ نہیں کھیلتے اس لیے دونوں کو زیادہ چیلنج لگتا ہے، پاکستان نے آج کافی اچھی بولنگ کی تھی۔

بشکریہ جنگ