جبران ناصر کی گمشدگی کیخلاف اہلیہ نے مقدمے کیلئے درخواست جمع کرا دی

جبران ناصر کی گمشدگی کے خلاف ان کی اہلیہ نے کراچی میں مقدمہ درج کرانے کے لیے درخواست تھانے میں جمع کرا دی۔

پولیس کے مطابق جبران ناصر کی اہلیہ نے درخواست کلفٹن تھانے میں جمع کرائی ہے۔

منشا پاشا نے کہا کہ میرے شوہر کو مسلح افراد نے زبردستی گاڑی سے اتارا اور ساتھ لے گئے، پولیس میری درخواست پر مقدمہ درج نہیں کر رہی، مقدمہ درج کرنے کے لیے کل عدالت سے رجوع کروں گی۔

درخواست گزار کا کہنا ہے کہ ڈیفنس فیز 5 کے قریب سے گزرتے ہوئے ہماری گاڑی سفید ڈبل کیبن سے ٹکرائی۔

کراچی میں جبران ناصر کو کچھ لوگ اپنے ہمراہ لے گئے، اہلیہ منشا پاشا نے ویڈیو بیان میں بتایا کہ سفید ڈبل کیبن گاڑی میں سوار مسلح افراد نے راستہ روکا اور جبران ناصر کو زبردستی اپنے ساتھ لے گئے۔

منشا پاشا کا درخواست میں کہنا ہے کہ سلور رنگ کی دوسری گاڑی نے ہماری گاڑی کا آگے سے راستہ روکا اور دونوں گاڑیوں میں تقریباً 15 مسلح افراد تھے۔

اس حوالے سے ایس ایس پی ساؤتھ اسد رضا نے کہا ہے کہ جبران ناصر سے متعلق درخواست موصول ہوئی ہے، کلفٹن تھانے میں اغوا کی دفعہ کے تحت منشا پاشا کی مدعیت میں مقدمہ درج کیا جا رہا ہے۔

بشکریہ جنگ