جاوید آفریدی کا بٹگرام ریسکیو آپریشن کے صاحب خان اور انکے ساتھی کیلئے بڑا اعلان

ضلع بٹگرام کے علاقے پاشتو الائی میں ریسکیو آپریشن کرنے والے مشن امپاسیبل کے ہیرو صاحب خان اور ان کے ساتھی کے لیے پی ایس ایل فرنچائز پشاور زلمی کے سربراہ جاوید آفریدی کی جانب سے نوکری کی پیشکش کی گئی ہے۔

سوشل میڈیا پلیٹ فارم ایکس (سابق ٹوئٹر) پر پوسٹ شیئر کرتے ہوئے پشاور زلمی کے سربراہ جاوید آفریدی نے صاحب خان اور ان کے ساتھ کو ملازمت دینے کا وعدہ کر دیا۔

انہوں نے صاحب خان کی ریسکیو آپریشن کرتے ویڈیو شیئر کی اور کیپشن میں لکھا کہ ’ناقابل یقین بہادری اور خود پر یقین، یہ بہترین مثال ہیں ہمت اور بہادری کی جو ہم سب کے لیے سبق ہے۔ مجھے ان دونوں (صاحب خان اور ان کی ساتھی) کو ملازمت کا موقع فراہم کرکے خوشی ہوگی، اس کے ساتھ ہی ان دونوں کے لئے سرپرائز ایوارڈ بھی ہے‘۔

خیال رہے کہ 22 اگست کو بٹگرام کے گاؤں الائی میں پاشتو کے مقام پر چیئرلفٹ کی رسی ٹوٹ گئی تھی، جس کے نتیجے میں اسکول کے 6 بچوں سمیت 8 افراد 900 فٹ کی بلندی پر پھنس گئے تھے۔

یہ بچے صبح 7 بجے کے وقت چیئرلفٹ کے ذریعے اپنے اسکول جارہے تھے کہ لفٹ کی تین میں سے دو رسیاں ٹوٹنے سے چیئرلفٹ تقریباً 900 فٹ کی بلندی پر پھنس گئی۔

تاہم پاک فوج، ریسکیو اہلکار اور مقامی افراد نے طویل جدوجہد کے بعد تمام افراد کو باحفاظت بچا لیا تھا۔

بشکریہ جنگ