جامعہ کراچی میں مزید 10 روز کلاسز کا بائیکاٹ
انجمن اساتذہ جامعہ کراچی نے سکریٹری بورڈز و جامعات کے رویے کے خلاف مزید 10 روز کلاسوں کا بائیکاٹ کرنے کا فیصلہ کیا ہے۔
جمعرات کو اساتذہ کے اجلاس کی صدارت انجمن اساتذہ جامعہ کراچی کے صدر شاہ علی القدر نے کی۔
انجمن اساتذہ کے سکریٹری محسن علی کے مطابق جب تک سلیکشن بورڈ نہیں ہوجاتا اس وقت تک احتجاج جاری رہے گا، جبکہ آئندہ کا لائحہ عمل آئندہ ہفتے جنرل باڈی اجلاس میں کیا جائے گا۔
یاد رہے کہ انجمن اساتذہ کا احتجاج اور کلاسوں کا بائیکاٹ منگل سے جاری ہے۔
انجمن اساتذہ جامعہ کراچی کے صدر شاہ علی القدر کا کہنا تھا کہ جب سلیکشن بورڈ شروع ہوا تھا تو سکریٹری بورڈز و جامعات نے سلیکشن بورڈ رکوا کر جامعہ کی خود مختاری پر حملہ کیا تھا سکریٹری کو اگر سلیکشن بورڈ پر اعتراض تھا تو وہ اسے پہلے کرسکتے تھے خط لکھ سکتے تھے۔
انہوں نے کہا سندھ میں قائم مقام وی سی لگا کر جامعات کی خود مختاری کو کنٹرول کررہے ہیں ۔
صدر اساتذہ نے کہا کہ ٹیچرز کے ساتھ تضحیک آمیز رویہ اختیار کیا گیا جو ہمیں برداشت نہیں۔
سیکریٹری بورڈز و جامعات مرید راحموں کا کہنا ہے کہ اساتذہ کا یوم سیاہ اور بائیکاٹ بلا جواز ہے،حکومت نے بھرتیوں پر پابندی عائد کر رکھی ہے تاہم جو بھی جامعہ ضروری بھرتی کرنا چاہے اس کے لیے پیشگی اجازت ضروری ہے اور کئی جامعات بھرتیوں کی اجازت لے چکی ہیں جامعہ کراچی کو بھی اجازت لینی چاہیے۔
Comments are closed.