تورخم بارڈر پر انٹیگریٹڈ بارڈر مینجمنٹ سسٹم نصب کریں، حنا ربانی کی چیئرمین نادرا کو ہدایت

وزیر مملکت برائے خارجہ حنا ربانی کھر سے چیئرمین نادرا طارق ملک نے ملاقات کی ہے، جس میں چیئرمین نیشنل ڈیٹا بیس اینڈ رجسٹریشن اتھارٹی (نادرا) نے اوورسیز پاکستانیوں کو اتھارٹی کی جانب سے فراہم کی جانے والی سہولتوں سے آگاہ کیا۔

چیئرمین نادرا نے چمن بارڈر کے انٹیگریٹڈ بارڈر مینجمنٹ سسٹم پر وزیر مملکت کو بریفنگ دی۔

طارق ملک نے کہا کہ تمام اسٹیک ہولڈرز بشمول پاکستان آرمی کے تعاون سے یہ سسٹم تیار کیا ہے۔

انہوں نے بتایا کہ سسٹم سے 20 ہزار سے زائد تاجر، مریض، زائرین اور دیگر افراد مستفید ہو رہے ہیں۔

حنا ربانی کھر نے کہا کہ اس نظام سے دونوں ممالک کے شہریوں کی سرحد پار نقل و حرکت میں آسانی ہے۔

انہوں نے ہدایت کی کہ چمن کی طرح تورخم بارڈر پر بھی انٹیگریٹڈ بارڈر مینجمنٹ سسٹم نصب کیا جائے۔

چیئرمین نادرا نے اوورسیز پاکستانیوں کے لیے ڈجیٹل پاور آف اٹارنی آن لائن سروس پر بھی بریفنگ دی۔

پاور آف اٹارنی کے حصول کے لیے اوورسیز پاکستانیوں کو مشکلات کا سامنا تھا۔

حنا ربانی کھر نے کہا کہ اوورسیز پاکستانیوں کے لیے آسانی پیدا کی جائے، بیرون ملک پاکستانیوں کا ملکی معیشت میں بےمثال کردار ہے۔

وزیر مملکت نے مزید کہا کہ اوورسیز پاکستانیوں کی فلاح و بہبود حکومت کی اولین ترجیحات میں شامل ہے۔

بشکریہ جنگ