تحریک انصاف میں مائنس ون کی کوئی گنجائش نہیں، شاہ محمود

وزیر خارجہ شاہ محمود قریشی کا کہنا ہے کہ تحریک انصاف میں مائنس ون کی کوئی گنجائش نہیں، ابہام دور کرلیں، کیا آپ نے زرداری اور نواز شریف کے لیے مائنس کی بات قبول کی، عمران خان نے تحریک انصاف کا پودا اپنے ہاتھ سے لگایا ہے۔

اسلام آباد میں پریس کانفرنس کرتے ہوئے شاہ محمود قریشی نے کہا کہ چوہدری برادران سیاسی فیصلے کرتے ہیں جذباتی نہیں، ن لیگ پر چوہدری برادران کبھی بھروسہ نہیں کریں گے۔

پاکستان تحریک انصاف کے کارکنوں نے سندھ ہاؤس کے باہر دھرنا دے دیا۔

شاہ محمود قریشی نے کہا کہ چوہدری برادران سے غیر سیاسی فیصلے کی توقع نہیں، کیا ایم کیو ایم کا کارکن پیپلز پارٹی کی سندھ سے زیادتیوں سے غافل ہے، آپ پیپلز پارٹی کی گود میں بیٹھیں گے یہ ہرگز سیاسی فیصلہ نہیں ہے۔

 وزیر خارجہ نے کہا کہ ہمارے اراکین جہاں بھی بیٹھے ہیں سمجھدار ہیں، انہیں قانون کا پتہ ہوگا، مخالف کی گود میں بیٹھ کر آپ مستقبل نہیں سنوار سکتے، ن لیگ نے ماضی میں کئی لوگوں سے ٹکٹوں کے وعدے کیے، کتنے وفا ہوئے، اپنے معزز ممبران سے کہوں گا غور کیجیے، گلے شکوے ہوجاتے ہیں ہر جائز بات سننے کو تیار ہیں، عدم اعتماد میں اپنی جماعت سے ہٹ کر کوئی فیصلہ بڑی غلطی ہوگی۔

مظاہرین نے مطالبہ کیا کہ عمران خان کے نام پر ووٹ لینے والے راجہ ریاض قومی اسمبلی کی رکنیت سے مستعفی ہوجائیں۔

شاہ محمود قریشی نے کہا کہ منحرف ہونے والے ارکان کے خلاف صدارتی ریفرنس دائر کیا جائے گا، ایک چیز اور گردش کررہی ہے کہ سب ٹھیک ہے عمران خان نہیں۔

انہوں نے کہا کہ سندھ میں گورنر راج کا کوئی ارادہ تھا نہ ہے، بلاول بھٹو بے جا پریشان نہ ہوں۔

بشکریہ جنگ