بیٹے کو بچانے کیلئے خاتون کی گہرے نالے میں چھلانگ

برطانیہ میں ایک خاتون نے اپنے 18 ماہ کے بیٹے کو بچانے کے لیے 20 فٹ گہرے گٹر میں چھلانگ لگا دی۔

واقعے کی ایک سی سی ٹی وی ویڈیو جسے خاتون نے اپنے فیس بک پر بھی شیئر کیا تھا، سوشل میڈیا پر وائرل ہوگئی ہے۔

وائرل ویڈیو میں 23 سالہ ایمی بیتھ کو اپنے 18 ماہ کے بیٹے تھیو کے ساتھ چہل قدمی کرتے دیکھا جا سکتا ہے۔

دونوں ایک ڈھکے ہوئے نالے سے گزرے لیکن بچہ مین ہول کے ڈھکن کے اندر گِر گیا، بچے کی والدہ نے ایک بار بھی نہیں سوچا اور نالے میں کود کر اپنے 18 ماہ کے بیٹے کو باہر نکالا۔  

اپنی فیس بک پوسٹ میں، خاتون نے لکھا کہ کل میری زندگی کا سب سے خوفناک ترین دن تھا، میرا بچہ ممکنہ طور پر اپنی جان سے ہاتھ دھو سکتا تھا۔

23 سالہ نوجوان خاتون نے کہا کہ وہ ذہنی طور پر کبھی بھی اس واقعے کو نہیں بھول سکیں گی۔

دوسری جانب سوشل میڈیا صارفین نے ویڈیو پر فوری ردعمل دیتے ہوئے والدہ کی ہمت کو سراہا۔

بشکریہ جنگ