بینو قادر ٹرافی میں قومی ٹیم کی قیادت کرنا اعزاز سے کم نہیں ، بابر اعظم

قومی کرکٹ ٹیم کے کپتان بابراعظم کا کہنا ہےکہ بینو قادر ٹرافی میں پاکستان کرکٹ ٹیم کی قیادت کرنا کسی اعزاز سے کم نہیں ، ان دونوں لیجنڈز کو خراج تحسین پیش کرنے کے لیے ہوم ٹیم سیریز میں بہترین کارکردگی کا مظاہرہ کرنے کی کوشش کریں گے۔

بابراعظم نے کہا کہ 24 سال بعد آسٹریلیا کے خلاف سیریز کی میزبانی پر وہ بہت پرجوش ہیں، پاکستان کرکٹ کے فینز نے ہمیشہ سوشل میڈیا کے ذریعے ان کی ٹیم کو بھرپور اسپورٹ کیا ہے۔

دنیا کی دو بہترین ٹیموں کے مابین پہلی بینو قادر ٹرافی کاآغاز 4 مارچ بروز جمعہ سے ہوگا، پاکستان اور آسٹریلیا کے مابین تین ٹیسٹ میچز پر مشتمل سیریز کا پہلا ٹیسٹ پنڈی کرکٹ اسٹیڈیم راولپنڈی میں کھیلا جائے گا، آسٹریلیا کا 24 سال بعد یہ پاکستان کا پہلا دورہ ہے۔

انہوں نے کہا کہ راولپنڈی کی عوام سے درخواست کی ہے کہ وہ بڑی تعداد میں اسٹیڈیم کا رخ کریں ، باقی تمام فینز اپنے گھروں میں موجود ٹی وی اسکرینز کے سامنے نشست سنبھال لیں اور کھلاڑیوں کی حوصلہ افزائی کریں۔

بشکریہ جنگ