بینظیر بھٹو کی برسی پر شہباز شریف کا پیغام

مسلم لیگ نون کے صدر شہباز شریف نے کہا ہے کہ محترمہ بینظیر بھٹو اسلامی دنیا کی پہلی خاتون وزیراعظم اور جمہوریت کی دلیر آواز تھیں۔

ایک بیان میں شہباز شریف کا کہنا تھا کہ بینظیر بھٹو ایک بہادر اور مقبول عوامی قائد تھیں، ان کی شہادت پاکستان ہی نہیں دنیا کی تاریخ کا ایک سانحہ ہے۔

انہوں نے یہ بھی کہا کہ بینظیر بھٹو کی شہادت کے پُراسرار عوامل پر اب تک پردہ پڑا ہوا ہے۔

شہید بےنظیر بھٹو کی 14ویں برسی کے موقع پر گڑھی خدا بخش میں تعزیتی جلسے کی تیاریاں مکمل کرلی گئی ہیں

ان کا مزید کہنا تھا کہ بینظیر بھٹو کی ملک و قوم اور جمہوریت کیلئے خدمات کو خراج عقیدت پیش کرتے ہیں، دعا ہے، اللّٰہ تعالی محترمہ کو جنت الفردوس میں اعلیٰ مقام عطا فرمائے اور لواحقین کو صبرجمیل دے۔

شہباز شریف نے بینظیر بھٹو کی 14ویں برسی پر آصف زرداری، بلاول، بختاور اور آصفہ سے اظہارِ تعزیت بھی کیا۔

بشکریہ جنگ