بیماری کا بہانہ کرینگے، نہ ملک سے فرار ہونگے: بزدار

سابق وزیرِ اعلیٰ پنجاب سردار عثمان بزدار کا کہنا ہے کہ ہم بیماری کا بہانہ کریں گے، نہ ملک سے فرار ہوں گے۔

لاہور سے جاری کیے گئے بیان میں سابق وزیرِ اعلیٰ پنجاب سردار عثمان بزدار نے یہ بات کہی ہے۔

ان کا کہنا ہے کہ پنجاب حکومت انتقامی کارروائیاں کر رہی ہے، عبوری ضمانت کے باوجود پولیس کی نفری بھیجی گئی۔

حکام کا کہنا ہے کہ ایک مقدمے میں عثمان بزدار اور ان کے بھائی نامزد ہیں، دوسرے مقدمے میں عثمان بزدار کے 2 بھائی نامزد ہیں۔

عثمان بزدار نے کہا ہے کہ ہمارے گھروں پر پولیس بھیج کر ڈرایا نہیں جا سکتا۔

انہوں نے مزید کہا ہے کہ اللّٰہ تعالیٰ کے فضل سے ہمارا دامن صاف ہے، پولیس اور انتظامیہ جعلی وزیرِ اعلیٰ کی کٹھ پتلی بن گئی ہے۔

سابق وزیرِ اعلیٰ پنجاب نے یہ بھی کہا ہے کہ ہم نے اپنے دورِ حکومت میں کسی قسم کی انتقامی کارروائی نہیں کی۔

بشکریہ جنگ