بہن کے جہیز کے زیورات چوری کرنے والا ڈرامائی انداز میں گرفتار

کراچی کے علاقے سر سید ٹاؤن میں بہن کے جہیز کے زیورات گھر سے لے کر رفو چکر ہونے والے نوجوان کو پولیس نے گرفتار کرلیا۔

ایس ایس پی سینٹرل معروف عثمان کے مطابق سر سید ٹاؤن پولیس نے اسنیپ چیکنگ کے دوران ایک مشتبہ شخص کو ہاتھ میں تھیلا لے کر جاتے ہوئے روکا جس پر نوجوان بھاگنے لگا۔

ایس ایس پی سینٹرل کے مطابق پولیس نے نوجوان کو پیچھا کرکے پکڑ لیا، مشتبہ شخص کے تھیلے کی تلاشی لی گئی تو اس میں 2 سیٹ طلائی زیورات، 4 لاکھ 35 ہزار سے زائد نقد اور 27 ہزار کے پرائز بانڈ موجود تھے۔

معروف عثمان کا کہنا ہے کہ مشتبہ شخص معلومات کرنے پر تسلی بخش جواب نہ دے سکا تو اسے تھانہ منتقل کیا گیا۔

پوچھ گچھ کے دوران مشتبہ شخص نے اپنا نام محمد خرم بتایا جس کا دماغی توازن درست معلوم نہیں ہورہا تھا۔

پولیس کے مطابق خرم نے بتایا کہ اس نے یہ زیورات اور کیش اپنے ہی گھر سے چرائے ہیں جس پر  اسے اس کے گھر لے جایا گیا۔

پولیس کا کہنا ہے کہ تصدیق پر معلوم ہوا کہ یہ زیورات اور نقد رقم اس کی والدہ نے اپنی بیٹی کی شادی کے لیے جمع کر رکھی تھی جو ان کا بیٹا خرم گھر سے چوری کر کے لے گیا تھا۔

سر سید پولیس نے برآمدہ سامان اور خرم کو گواہوں کی موجودگی میں والدہ کے سپرد کردیا جس پر انہوں نے سر سید پولیس کا شکریہ ادا کیا۔

بشکریہ جنگ