بھونگ مندر حملہ کیس میں انسداد دہشت گردی عدالت نے فیصلہ سنادیا

بھونگ مندر حملہ کیس میں انسداد دہشت گردی عدالت نے فیصلہ سنادیا، عدالت نے 22 ملزمان کو 5، 5 سال قید اور جرمانے کی سزا سنائی ہے۔

انسداد دہشت گردی عدالت بہاول پور نے رحیم یار خان میں مندر حملہ کیس میں جرم ثابت ہونے پر 22 ملزمان کو 5،5 سال قید اور 4،4 لاکھ روپے کے جرمانے کی سزاسنادی۔

جرمانے کی عدم ادائیگی پر ملزمان کو دیگر دفعات کے تحت مجموعی طور پر 11،11ماہ مزید قید بھگتنا ہوگی، 62 ملزمان کو شک کا فائدہ دے کر بری کردیا گیا۔

خصوصی عدالت بہاولپور کے جج ناصر نے کیس کا فیصلہ سنایا، 84 ملزمان پر الزام تھا کہ انہوں نے 4 اگست2021 کو بھونگ میں اقلیتی مذہبی عبادت گاہ پر حملہ کرکے توڑ پھوڑ کی تھی جس کا مقدمہ تھانہ بھونگ میں درج کیا گیا تھا۔

عدالت میں جرم ثابت ہونے پر ملزمان شفیق، شیراز، لطیف، فاروق، غلام عباس، دھنی بخش، بخشہ، عبدالحکیم، اسامہ، ابوبکر، محمدخان، محمد اکبر، خدا بخش، شاہد حسین، محمدعلی، محمد جہانگیر، نذیر احمد، محمدآصف، شاہ میر، امیر دین، فخر عباس اور مطلوب احمد کو 5,5 سال قید اور  4,4لاکھ روپے جرمانہ کی سزا سنادی۔

عدالت نے 62 ملزمان کو شک کا فائدہ دیتے ہوئے بری کردیا۔ 4 اگست 2021 کو مندرپر حملہ کیا گیا تھا۔

بشکریہ جنگ