بھتے اور فائرنگ میں ملوث 2 ملزمان سپر ہائی وے سے گرفتار، 2 کلاشنکوف برآمد

کراچی کے تاجروں سے بھتہ وصولی کے فون کرنے اور بھتہ نہ دینے پر ان کے گھروں پر فائرنگ کی وارداتوں میں ملوث 2 ملزمان کو سائٹ سپر ہائی وے پولیس نے گرفتار کرلیا جن کے قبضے سے 2 کلاشنکوف برآمد ہوئیں۔ 

سینئر سپریٹنڈنٹ پولیس ٹیسٹ زبیر نذیر شیخ کے مطابق ملزم احمد اللہ عرف بشیر اور ساتھی نعمت اللہ کو سائٹ سپر ہائی وے پر دھنی بخش گوٹھ سے گرفتار کیا گیا تھا۔ 

ڈی ایس پی سہراب گوٹھ سہیل فیض کے مطابق ملزمان کی نشاندہی پر ایک خالی پلاٹ میں چھپائی گئی 2 کلاشنکوف گولیاں اور دیگر سامان برآمد کیا گیا۔ 

پولیس کے مطابق ملزمان کالعدم تنظیم سے تعلق رکھتے ہیں جو تربیت کے لیے کئی بار افغانستان جا چکے ہیں۔ 

ملزمان اسی کالعدم تنظیم کے نام پر کراچی کے تاجروں کو بھتہ کے لئے فون کال کرتے رہے اور بھتہ نہ دینے پر ان کے گھروں پر فائرنگ میں بھی ملوث رہے ہیں۔

بشکریہ جنگ