بھارت کے خلاف میچ جیتنے پر مختلف شہروں میں جشن

بھارت کے خلاف پاکستان کی جیت پر ملک کے مختلف شہروں میں جشن منایا گیا اور ڈھول کی تھاپ پر بھنگڑے ڈالے گئے۔

قومی ٹیم کی کامیابی پر پاکستان زندہ باد کے نعرے لگائے گئے اور مٹھائیاں تقسیم کی گئیں جبکہ آتش بازی کا مظاہرہ بھی دیکھنے کو ملا۔

بھارت کیخلاف میچ جیتنے پر لاہور میں نوجوان سڑکوں پر نکل آئے۔ تفریحی مقام ناران میں سیاحوں نے بھی جشن منایا، اسی طرح وادیٔ ہنزہ میں بھی خوب جشن منایا گیا۔

بھارت کی جانب سے دیا گیا 182 رنز کا ہدف قومی بیٹرز نے 5 وکٹوں کے نقصان پر آخری اوور کی پانچویں گیند پر پورا کرلیا۔

دوسری جانب بھارت کے خلاف پاکستان کی فتح کا جشن نمیبیا میں بھی منایا گیا۔

گلوبل ٹی ٹوئنٹی کیلئے نمیبیا میں موجود لاہور قلندرز کی پی ڈی پی کلاس آف 2022 کے کھلاڑیوں نے ہوٹل میں میچ دیکھا اور جیت پر خوب جشن کیا۔

بشکریہ جنگ