بھارت: ایمیزون نے 500 ملازمین کو فارغ کر دیا

ای کامرس کمپنی ایمیزون نے بھارت سے 500 ملازمین کو فارغ کر دیا۔

غیر ملکی میڈیا رپورٹس کے مطابق ڈاؤن سائزنگ کے دوران ای کامرس کمپنی ایمیزون نے اپنے بھارت میں قائم دفتر سے تقریباً 500 ملازمین کو نوکری سے فارغ کر دیا۔

رواں سال مارچ سے شروع ہونے والے دوسرے مرحلے کی وسیع تر پیمانے پر ہونے والی برطرفیوں کے دوران اب تک کل 9 ہزار ملازمین متاثر ہوچکے ہیں۔

میڈیا رپورٹس کے مطابق رواں ماہ اب تک ویب سروسز، ہیومن ریسورسز اور سپورٹ ڈیپارٹمنٹ سے ملازمین کو نکالا گیا ہے، جن میں چند ملازمین بھارت سے عالمی ٹیموں کے ساتھ کام کرتے تھے۔

عالمی وبا کورونا کے دوران صارفین کی بڑی تعداد میں آن لائن شاپنگ کا رجحان پیدا ہوا تاہم کورونا وباء کے ختم ہونے کے بعد صارفین خریدار کی پرانی عادت کی جانب لوٹ رہے ہیں جس کی وجہ سے ای کامرس کی ترقی سست روی کا شکار ہوگئی ہے۔

خیال رہے کہ میٹا اور گوگل کی طرح ایمیزون بھی کئی بڑی ٹیک کمپنیوں میں شامل ہے جو ترجیحات کی بنیاد پر اپنے ملازمین کو برطرف کر رہی ہے۔

یاد رہے کہ رواں برس جنوری میں برطرفیوں کا اعلان کرنے کے بعد سے اب تک تقریباً 18,000 ملازمین کو فارغ کرچکی ہے۔

بشکریہ جنگ