بچے کی لاش کے سرہانے کھڑی فلسطینی ماں کی گود میں موجود بیٹی بھی شہید

غزہ میں 10 دن سے جاری اسرائیلی حملوں میں خواتین اور بچوں سمیت ہزاروں افراد شہید ہو چکے ہیں۔

سوشل میڈیا پر فلسطینی شہریوں کی دل دہلا دینے والی سیکڑوں ویڈیوز سامنے آ رہی ہیں۔

اب ایک اور ویڈیو بھی سامنے آئی ہے جس سے اسرائیلی جارحیت کا باخوبی اندازہ لگایا جا سکتا ہے۔

عرب میڈیا کے مطابق غزہ میں ایک ماں نے بمباری کے نتیجے میں اپنے دونوں بچوں کو کھو دیا۔

عرب میڈیا کے مطابق ماں کے سامنے اسپتال میں اس کے بڑے بیٹے کی لاش رکھی تھی، غم سے نڈھال ماں نے اسی دوران اپنی چھوٹی بیٹی کو زندہ سمجھ کر دودہ پلانا چاہا اور اسی غرض سے وہ آگے بڑھی تاہم اس کی چھوٹی بیٹی بھی شہید ہو چکی تھی۔

عرب میڈیا کے مطابق جب ماں کو اندازہ ہوا کہ بچی بھی شہید ہو چکی ہے تو وہ صدمے سے نڈھال ہو گئی، ماں کی زبان سے ایک ہی بات جاری تھی ’میری بچی کو اٹھاؤ‘۔

واضح رہے کہ 7 اکتوبر سے جاری اسرائیلی بمباری کے نتیجے میں اب تک شہید فلسطینیوں کی تعداد 2900 سے تجاوز کر چکی ہے۔

میڈیا کی رپورٹس کے مطابق شہید ہونے والوں میں 1 ہزار سے زائد بچے بھی ہیں۔

بشکریہ جنگ