بلوچستان، جنگلات میں لگی آگ پر قابو نہ پایا جاسکا

بلوچستان کے ضلع شیرانی کے جنگلات میں لگی آگ پر قابو نہیں پایا جاسکا، وزیراعظم کی ہدایت پر بلوچستان حکومت کی امداد جاری ہے۔

رپورٹس کے مطابق پاک فوج اور ایف سی کی امدادی کارروائیاں جاری ہیں، این ڈی ایم اے کی طرف سے بلوچستان حکومت کو آگ بجھانے کیلئے ضروری سامان فراہم کردیا گیا ہے۔

ڈیرا اسماعیل خان کے علاقے مغل کوٹ کے جنگلات میں لگی آگ بلوچستان کے سرحدی علاقے منڑہ اور سُرلکئی تک پہنچ گئی ہے۔

آئی ایس پی آر کے مطابق ہیٹ اسٹروک کیمپ چیف آف آرمی اسٹاف کی خصوصی ہدایت پر قائم کئے گئے ہیں۔

آگ سے چلغوزے، زیتون کے درخت اور جنگلی حیات متاثر ہوئے ہیں۔ وزیراعظم شہباز شریف نے فوری طور پر واقعات کی وجوہات کا پتا لگانے کا حکم دیا ہے۔

آئی ایس پی آر کے مطابق 2 آرمی ہیلی کاپٹر آگ بجھانےاور امدادی سرگرمیوں میں مصروف ہیں، اس کے علاوہ فائربالز، فائرسوٹ، کمبل، خیمے،چٹائیاں اور آگ بجھانے کا سامان فراہم کیاگیا ہے۔

پاک فوج کے شعبہ تعلقات عامہ( آئی ایس پی آر) کے مطابق مقامی انتظامیہ،لیویزکے ساتھ ایف سی ونگ امدادی سرگرمیوں میں مصروف ہیں۔

بشکریہ جنگ