بلدیاتی انتخاب سے متعلق الیکشن کمیشن نے ڈی سیز سے رپورٹ لی ہے، شرجیل میمن

صوبائی وزیر اطلاعات شرجیل انعام میمن کا کہنا ہے کہ پچھلی بار بلدیاتی انتخابات ملتوی ہوئے تو اس میں حکومت سندھ کی سفارش نہیں تھی، الیکشن کمیشن نے تمام ڈی سیز سے رپورٹ لی ہے دیکھا جائے گا کہ انتخابات ہوتے ہیں یا نہیں۔

الیکشن کمشنر سندھ کا کہنا ہے کہ بارش سے متاثرہ مقامات پر پولنگ اسٹیشنز متاثر ہیں، کراچی کے علاقوں خاص طور ملیر، لیاری، کھارادر، میٹھادر میں بھی پانی موجود ہے۔

حیدر آباد میں میڈیا سے گفتگو کرتے ہوئے شرجیل میمن نے کہا کہ جو بھی رپورٹ ہوگی اس پر الیکشن کمیشن ہی فیصلہ کرے گا، پیپلز پارٹی الیکشن کے لیے ہر وقت تیار ہے۔

صوبائی وزیر شرجیل میمن نے کہا کہ ہمیں امید ہے کہ آج این اے 245 پر جیت جائیں گے،  یہی وجہ ہے کہ ہمارے امیدوار کو دستبردار کروایا تھا۔

انہوں نے کہا کہ عمران خان سازش کر رہے ہیں، عوام کو سازش نا کام بنانا ہوگی، دھمکی دھونس کی سیاست اس ملک میں کبھی نہیں ہوئی۔

بشکریہ جنگ