برطانیہ: رشی سُونک کا وزارتِ عظمیٰ کی دوڑمیں شامل ہونے کا باضابطہ اعلان

سابق برطانوی چانسلر رشی سُونک نے وزارتِ عظمیٰ کی دوڑ میں شامل ہونے کا باضابطہ اعلان کر دیا۔

میڈیا سے گفتگو کرتے ہوئے رشی سُونک کا کہنا ہے کہ برطانیہ عظیم ملک ہے لیکن اسے گہرے معاشی بحران کا سامنا ہے۔

انہوں نے یہ بھی کہا کہ معیشت کو درست اور پارٹی کو متحد کر کے ملک کے لیے ڈیلیور کرنا چاہتا ہوں۔

برطانیہ کا اگلا وزیراعظم بننے کی دوڑ میں رشی سونک کی سب سے مضبوط پوزیشن ہے جبکہ بورس جانسن نے بھی قدم جمالیے ہیں۔

میڈیا رپورٹ کے مطابق رشی سُونک کو پہلے ہی 130 ٹوری ارکانِ پارلیمنٹ کی حمایت حاصل ہے، وزارتِ عظمیٰ کی دوڑ میں شامل ہونے کے لیے 100 اراکین کی حمایت لازمی ہے۔

میڈیا رپورٹ میں کہا گیا ہے کہ برطانوی وزیرِ اعظم بننے کے لیے پیر کو دن 2 بجے تک متعلقہ کمیٹی سے رجوع کیا جا سکتا ہے۔

میڈیا رپورٹ میں بتایا گیا ہے کہ پینی مورڈنٹ پہلے ہی وزارتِ عظمیٰ کی دوڑ میں شامل ہونے کا اعلان کر چکی ہیں۔

بزنس سیکریٹری جیکب ریس موگ کے مطابق بورس جانسن بھی دوبارہ وزیرِ اعظم بننے کے امیدوار ہوں گے۔

میڈیا رپورٹ میں یہ بھی بتایا گیا ہے کہ اس وقت تک بورس جانسن کو 55 اور پینی مورڈنٹ کو 23 اراکین کی حمایت حاصل ہے۔

بشکریہ جنگ