امریکی نیوی نے سمندر میں پانی کے نیچے ایک پہاڑ سے ٹکرا کر تباہ ہونے والی ایٹمی آبدوز کے تین اعلیٰ ارکان کو برطرف کر دیا ہے۔

کمانڈر کیمرون الجیلانی اور دیگر دو کو متنازعہ جنوبی بحیرہ چین میں پیش آنے والے واقعے کی تحقیقات کے بعد ہٹا دیا گیا تھا۔

یو ایس ایس کونیٹیکٹ گزشتہ ماہ ایک چٹان سے ٹکرا گئی تھی، جس کی وجہ سے اسے ایک ہفتے کے لیے سطح سمندر پر آنا پڑا اور بالاخر اسے گوام کے امریکی علاقے میں لے جایا گیا۔

نیوی حکام کا کہنا ہے کہ عملے کے ارکین تصادم کو ’روک سکتے تھے۔‘

گذشتہ ہفتے بحریہ نے کہا تھا کہ آبدوز سطح کے نیچے گشت کے دوران ایک نامعلوم ’سی ماؤنٹ‘ یا سمندری چٹان سے ٹکرا گئی تھی۔

اس حادثے میں پندرہ سیلروں یا ملاحوں کو معمولی چوٹیں آئی تھیں۔ آبدوز کے نقصان کی فی الحال بحرالکاہل میں واقع گوام جزیرے میں جانچ پڑتال کی جا رہی ہے اور اس کے بعد اسے مرمت کے لیے واشنگٹن واپس لایا جائے گا۔

یہ واقعہ خطے میں بڑھتی ہوئی کشیدگی کے دوران پیش آیا تھا۔

یہ بھی پڑھیئے

امریکہ کی جوہری آبدوز بحیرہ جنوبی چین میں نامعلوم شے سے ٹکرا گئی

متنازع جزیرے پر چینی بمبار طیاروں کی لینڈنگ

امریکہ: بحیرہ جنوبی چین کے وسائل پر قبضے کی چینی کوششیں ’غیر قانونی‘ ہیں

یو ایس ایس کونیٹیکٹ دنیا کے سب سے زیادہ تناؤ والے خطے میں کام کر رہی تھی۔ چین بحیرہ جنوبی چین کے زیادہ تر حصے پر دعویٰ کرتا ہے لیکن ارد گرد کے ممالک اور امریکہ اس سے متفق نہیں۔

یہ واقعہ امریکہ، برطانیہ اور آسٹریلیا کے درمیان ایشیا پیسیفک میں آبدوز ٹیکنالوجی کے اشتراک کے لیے ایک تاریخی سیکیورٹی معاہدے پر اتفاق کے چند ہفتوں بعد پیش آیا تھا۔ اس معاہدے کو چین کی طاقت کا مقابلہ کرنے کی ایک کوشش کے طور پر دیکھا جا رہا ہے۔

حادثے سے بیجنگ میں حکام کافی ناراض ہوئے اور انھوں نے سوال کیا کہ آبدوز خطے میں کیا کر رہی تھی۔ انھوں نے یہ بھی کہا کہ انھیں فکر ہے کہ آبدوز سے ممکنہ جوہری لیکیج نہ ہوئی ہو۔

خبر رساں ادارے روئٹرز کے مطابق جمعہ کو ایک پریس بریفنگ میں چینی وزارت خارجہ کے ترجمان نے کہا کہ امریکہ کو اس واقعے کی مکمل تفصیل دینی چاہئیں اور ’اپنی اشتعال انگیزی روکنی چاہیے۔‘

امریکی بحریہ کے حکام نے ابھی تک اس بات کی وضاحت نہیں کی ہے کہ جہاز سمندر کی تہہ میں ابھری ہوئی چٹان سے کیسے ٹکرایا۔

برطانوی رائل نیوی کے ایک سابق آبدوز کپتان ریان رامسے کہتے ہیں کہ وہ اس تصادم سے بہت حیران ہوئے تھے، جو کہ نسبتاً بہت کم ہی ہوتا ہے۔

انھوں نے بی بی سی کو بتایا کہ ’یو ایس ایس کونیٹیکٹ ایک بہت ہی جدید آبدوز ہے، اس لیے یہ ایک طرح کی حیران کن بات ہے۔ لیکن اگر آپ کسی بھی وقت ریلیکس ہو جائیں، تو (ایسی) چیزیں ہو سکتی ہیں۔‘