بحری جہاز ازخود نہیں نکل رہا، گڈاںی کی شپ بریکنگ کمپنی کی بلامعاوضہ شبانہ روز محنت شامل
کراچی کے ساحل پر پھنسا بحری جہاز اچانک ازخود ریت سے نہیں نکل رہا بلکہ اسے نکالنے کے لیے گڈانی کی نجی کمپنی کی ایک ہفتے سے زائد کی کوششیں شامل ہیں۔
ذرائع کے مطابق بحری جہاز کے مالک نے کراچی میں اپنے دوست اقبال گھانچی کی نجی کمپنی ’ایان شپ بریکرز‘ کی خدمات حاصل کی ہیں۔
کمپنی ذرائع کے مطابق بلوچستان کے گڈانی شپ بریکنگ یارڈ میں کام کرنے والی ایان شپ بریکرز نے دو اگست کے بعد اپنی ہیوی مشینری اور عملے کو کراچی سی ویو پہنچایا اور کمپنی کی جانب سے کلفٹن میں سی ویو پر پھنسے غیر ملکی بحری جہاز کو نکالنے کا کام شروع کیا۔
کمپنی کی جانب سے ’جنگ‘ کو فراہم کی گئی تصاویر میں دیکھا جاسکتا ہے کہ آپریشن شروع کیے جانے سے قبل جہاز مکمل طور پر ریت میں دھنسا ہوا تھا، جہاز کے چاروں طرف سے شاولز کی مدد سے ریت ہٹانے کا عمل کئی دن جاری رہا۔
نجی کمپنی ذرائع کے مطابق جہاز کو ریت سے بچانے کے لیے شپ بریکرز کارکنوں نے آہنی ہیوی پلیٹس استعمال کیں۔
بحری جہاز نکالنے کے لیے آپریشن پیر کی صبح مکمل کرلیا گیا تھا اور پیر کی فوٹیجز میں دیکھا جاسکتا ہے کہ جہاز کے چاروں طرف پانی ہی پانی تھا۔
کمپنی ذرائع کے مطابق صرف جہاز کے نیچے ریت رہ گئی ہے، ہائی ٹائیڈز کے دوران جہاز کو نکالنے کے لیے طاقتور ٹگز کے جھٹکے کی ضرورت ہے جس سے جہاز فلوٹنگ کرنے لگے گا۔
ذرائع کے مطابق یہ کام دوستی اور مشکل میں امداد کے ناطے بلا معاضہ کیا جارہا ہے۔
Comments are closed.