بارسلونا کے ہیڈ کوچ رونالڈ کوئمن برطرف

لالیگا میں مایوس کن پرفارمنس کے بعد بارسلونا نے ہیڈ کوچ رونالڈ کوئمن کو برطرف کردیا۔

رائیو ویلکانو نے کھیلے گئے میچ میں بارسلونا کو ایک صفر سے شکست دی تھی، مسلسل خراب پرفارمنس کی وجہ سے بارسلونا کی ٹیم لیگ پر نویں پوزیشن پر آگئی ہے۔

میسی کا سابق کلب 10 میں سے صرف 4 میچز جیت سکا ہے۔

بارسلونا کے صدر نے آج کی شکست کے بعد رونالڈ کوئمن کو فارغ کردیا، رونلڈ کوئمن کا شمار بارسلونا کے لیجنڈز میں ہوتا ہے۔

اسپینش فٹ بال لیگ میں بارسلونا کو ایک اور شکست ہوگئی، رائیو ویلکانو نے ایک صفر سے مات دی۔

واضح رہے کہ بارسلونا اور رائیو ویلکانو کے درمیان میچ میں تمام وقت بارسلونا کا پلہ بھاری رہا جس کے کھلاڑیوں نے زیادہ تر وقت گیند اپنے پاس رکھی مگر وہ حریف ٹیم کے گول کیپر کو چکمہ نہ دے سکے۔

رائیو ویلکانو کے جو فلکاؤ نے فیصلہ کن گول کھیل کے پہلے ہاف کے 30ویں منٹ میں اسکور کیا، میچ کے بقیہ وقت میں بارسلونا کی ٹیم خسارہ پورا کرنے میں ناکام رہی ۔

ایونٹ کے تمام میچز جیو سوپر سے براہ راست نشر کیے جارہے ہیں۔

بشکریہ جنگ