بابر غوری انسداد دہشت گردی کے مقدمے میں باقاعدہ گرفتار

ایم کیو ایم رہنما بابر غوری کو انسداد دہشت گردی کے مقدمے میں باقاعدہ طور پر گرفتار کرلیا گیا۔

بابر غوری کو ریمانڈ کے لیے آج سندھ ہائی کورٹ میں پیش کیا جائے گا۔

انسداد دہشت گردی کی عدالت کے منتظم جج سابق وفاقی وزیر بابر غوری کا ریمانڈ دیں گے۔

بابر غوری کی گرفتاری سائٹ سپرہائی وے تھانے کے مقدمے میں ظاہر کی گئی ہے۔

متحدہ قومی موومنٹ (ایم کیو ایم) کے خود ساختہ جلا وطن رہنما اور سابق وفاقی وزیر پورٹ اینڈ شپنگ بابر خان غوری کی گرفتاری پر ان کے وکیل کا بیان آگیا ہے۔

پولیس ذرائع نے انکشاف کیا ہے کہ بابر غوری کو ریاست کے خلاف مجرمانہ سرگرمیوں کے مقدمے میں گرفتار کیا گیا ہے۔

بابر غوری کے خلاف ایف آئی آر نمبر 354 سال 2015 میں ان کی جلاوطنی کے دنوں میں درج کی گئی ۔

مقدمہ زیر دفعہ 120 اے بی/ 121/122/505/123 ریڈ ودھ ٹیلیگراف ایکٹ اور 6/7 ATA درج ہے۔

ایف آئی آر میں قائد ایم کیو ایم، فاروق ستار، بابر غوری سمیت ایم کیو ایم کے 29 رہنما نامزد تھے۔

واضح رہے کہ سابق وفاقی وزیر بابر غوری کو گزشتہ روز وطن واپسی پر کراچی ایئرپورٹ سے گرفتار کیا گیا تھا۔

بابر غوری 7سال سے منی لانڈرنگ، زمینوں پر قبضے اور کے پی ٹی میں غیرقانونی بھرتیوں سمیت کئی مقدمات میں پولیس کو مطلوب تھے۔

بشکریہ جنگ