بابر اعظم زبردست کارکردگی پر محمد حارث کے معترف

پاکستان کرکٹ ٹیم کے کپتان بابر اعظم نے بنگلادیش کے خلاف میچ میں زبردست کارکردگی کا مظاہرہ کرنے پر محمد حارث کی کھل کر تعریف کی۔

میچ کے بعد ڈریسنگ روم میں ٹیم سے خطاب کرتے ہوئے بابر اعظم نے کہا کہ آئندہ میچز میں ہم نے پوری کوشش کرنی ہے اور اپنا پورا زور لگانا ہے، ہر کھلاڑی کو میچ ختم کرنے کی کوشش کرنی ہے۔

بابر اعظم نے مزید کہا کہ پچھلے دو میچز میں جس طرح تمام لوگ ٹیم بن کر کھیلے، آگے بھی اسی طرح کھیلنا اور چلنا ہے، ٹیم کی جیت کے لیے اپنا 100 فیصد حصہ شامل کرنا ہے۔

ایونٹ کا پہلا سیمی فائنل پاکستان اور نیوزی لینڈ کے درمیان بدھ کو کھیلا جائے گا۔

قومی ٹیم کے کپتان نے نوجوان بیٹر محمد حارث کی تعریف کرتے ہوئے کہا کہ جس طرح تم کھیلے ہو آئندہ بھی ایسے ہی کھیلنا ہے اور کوشش یہی کرنی ہے کہ میچ کو ختم کر کے ہی آئیں۔

انہوں نے مزید کہا کہ ایسا کرنے سے تمہارا اعتماد بڑھے گا۔

بابر اعظم کی طرف سے داد ملنے پر پوری ٹیم نے محمد حارث کے لیے تالیاں بجاتے ہوئے ان کی خوب حوصلہ افزائی بھی کی۔

بابر اعظم نے محمد حارث کو سمجھاتے ہوئے کہا کہ یہ چھوٹی چھوٹی باتیں آپ کو آگے تک لے کر جائیں گی، ہمارے سینئرز نے بھی ہمیں یہی بتایا ہے کہ جب آپ میچ ختم کرکے آتے ہیں تو اگلے میچ میں آپ کا اعتماد مزید بڑھ جاتا ہے۔

انہوں نے بنگلادیش کے خلاف پاکستانی کرکٹ ٹیم کی بولنگ کی بھی بھرپور تعریف کی۔

بشکریہ جنگ