اے این ایف کی کارروائیاں، منشیات و نشہ آور گولیاں برآمد

اینٹی نارکوٹکس فورس (اے این ایف) نے مُلک بھر میں منشیات کے خلاف کامیاب کارروائیاں کی ہیں جن کے دوران منشیات اور نشہ آور گولیاں برآمد کی گئی ہیں۔

اسلام آباد انٹرنیشنل ایئر پورٹ پر اے این ایف اور اے ایس ایف نے مشترکہ کارروائی کرتے ہوئے بونیر کے رہائشی ملزم کے ٹرالی بیگ سے 1 کلو 98 گرام ہیروئین برآمد کر لی۔

ملزم فلائٹ نمبر PK181 سے شارجہ جا رہا تھا۔

اسلام آباد ایئر پورٹ ہی پر کارگو ایریا میں کارروائی کرتے ہوئے دورانِ تلاشی مشکوک پارسل سے 4480 نشہ آور گولیاں برآمد کر لی گئیں۔

گولیوں کامجموعی وزن 1 کلو 100 گرام ہے، جن کے ساتھ لاہور کے رہائشی ملزم کو گرفتار کیا گیا ہے۔

پشاور میں کار کے خفیہ خانوں سے 38 کلو 400 گرام چرس برآمد کر لی گئی جبکہ پشاور کے رہائشی 2 ملزمان کو گرفتار کیا گیا ہے، جو چرس خیبر سے پنجاب اسمگل کر رہے تھے۔

اینٹی نارکوٹکس فورس نے کراچی میں کارروائی کر کے 3 کنٹینر سے 3 لاکھ سے زائد نشہ آور گولیاں برآمد کر لیں۔

اے این ایف اور ایف سی کی مشترکہ کارروائی میں خیبر سے پلاسٹک کے تھیلوں سے 10 کلو چرس برآمد کر لی گئی۔

لاہور انٹر نیشنل میل آفس میں آسٹریلیا بھیجے جانے والے پارسل سے 1 کلو 18 گرام آئس برآمد کی گئی ہے۔

برآمدشدہ آئس شیٹس اور کمبل میں چھپائی گئی تھی۔

ملزمان کے خلاف انسدادِ منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

بشکریہ جنگ