این اے 133 میں شیر دھاڑے گا، عطا تارڑ

مسلم لیگ نون کے رہنما عطاﷲ تارڑ نے کہا ہے کہ این اے 133 میں کوئی دوسری جماعت نظر نہیں آرہی، حلقے میں شیر دھاڑے گا۔

ایک بیان میں انہوں نے کہا کہ ہر یوسی میں ہمارے نمائندے ہیں، ہماری جماعت کے پاس پورا اسٹرکچر موجود ہے، این اے 133 میں الیکشن یک طرفہ ہے۔

لاہور کے حلقے این اے 133 میں ضمنی انتخاب کے لیے پولنگ جاری ہے، مسلم لیگ نون کی شائستہ پرویز ملک اور پیپلز پارٹی کے چوہدری اسلم گِل سمیت 11امیدوار میدان میں ہیں۔

ان کا کہنا ہے کہ نون لیگ نے کبھی ووٹ خریدنے کی سیاست نہیں کی، ووٹ خریدنے کی مبینہ ویڈیو کی تردید کرتا ہوں۔

عطاﷲ تارڑ نے یہ بھی کہا کہ چیلنج کرتا ہوں ویڈیو کی فرانزک کرالیں، ویڈیو میں نظر آنے والے پیپلز پارٹی کے اپنے لوگ ہیں۔

واضح رہے کہ لاہور کے حلقے این اے 133 میں ضمنی انتخاب کے لیے پولنگ جاری ہے، جو شام 5 بجے تک کسی وقفے کے بغیر جاری رہے گی۔

این اے 133 لاہور کی نشست مسلم لیگ نون کے ایم این اے محمد پرویز ملک کے انتقال کے باعث خالی ہوئی تھی۔

لاہور میں این اے 133 پر آج ہونے والے ضمنی الیکشن کے سلسلے میں گورنمنٹ گریجویٹ کالج فار ویمن ٹاؤن شپ میں واقع پولنگ اسٹیشن پر تاحال پولنگ شروع نہیں ہو سکی۔

مسلم لیگ نون کی شائستہ پرویز ملک اور پیپلز پارٹی کے چوہدری اسلم گِل سمیت 11 امیدوار اس حلقے سے میدان میں ہیں۔

بشکریہ جنگ