اینڈریو پٹک کی افغانستان میں تقرری، پی سی بی حیران

پاکستان کرکٹ ٹیم کے سابق بیٹنگ کوچ اینڈریو پیوٹک کو افغانستان کرکٹ بورڈ نے ٹیم کا بیٹنگ کوچ مقرر کردیا ہے۔

پاکستان کرکٹ بورڈ (پی سی بی) نے اس پیشرفت پر حیرت کا اظہار کرتے ہوئے کہا ہے کہ پیوٹک نے پی سی بی کو اب تک استعفیٰ نہیں دیا ہے۔ 

جنوبی افریقا سے تعلق رکھنے والے اینڈریو پیوٹک کو پی سی بی نے مئی 2023 میں 2 سال کے لیے پاکستان ٹیم کا بیٹنگ کوچ مقرر کیا تھا۔

تاہم ورلڈ کپ کے بعد پی سی بی کی نئی مینجمنٹ کمیٹی نے انہیں نیشنل کرکٹ اکیڈمی (این سی اے) میں رپورٹ کرنے کو کہا تھا، جس کے بعد سے وہ چھٹیوں پر تھے۔

بدھ کو خبر آئی کہ افغانستان کرکٹ بورڈ نے اینڈریو پیوٹک کو بیٹنگ کوچ مقرر کردیا ہے۔

تاہم پاکستان کرکٹ بورڈ نے کہا کہ پیوٹک نے اپنے فیصلے سے پی سی بی کو آگاہ نہیں کیا، اسے یہ اطلاع میڈیا سے ہی ملی ہے۔

پی سی بی ترجمان نے اس بات کی تصدیق کی ہے کہ اینڈریو پیوٹک نے پاکستان کرکٹ بورڈ کو استعفیٰ نہیں بھجوایا۔

ذرائع کا کہنا ہے کہ پی سی بی کی نئی مینجمنٹ کمیٹی نے غیر ملکی کوچز کو یہ عندیہ دیا تھا کہ وہ ان کے پلانز میں نہیں لیکن اختیارات محدود ہونے کی وجہ سے ان کا کنٹریکٹ ختم نہیں کیا جاسکا تھا۔

بشکریہ جنگ