ایشین گیمز، مختلف کھیلوں کے 67 آفیشلز کے نام فائنل

ایشین گیمز کے لیے مختلف کھیلوں کے 67 آفیشلز کے نام بھی فائنل کرلئے گئے، پہلی فہرست سے پانچ کھلاڑیوں کو ڈراپ کردیا گیا، کھلاڑیوں کا دستہ اب 213 ایتھلیٹس پر مشتمل ہوگا۔

ذرائع کے مطابق اکثر کھیلوں میں فیڈریشن کے عہدیداران ہی ٹیم آفیشلز بنے ہوئے ہیں، مینز کرکٹ کے لیے شاہد اسلم، عمر رشید، حنیف ملک اور حافظ نعیم رسول مینجمنٹ میں شامل ہیں۔

ذرائع کے مطابق ویمنز کرکٹ کے لیے مہتشم رشید، سلیم جعفر، رفعت گل، توفیق عمر اور عائشہ اشعر شامل ہیں، ایتھلیٹکس میں صدف صدیقی، فیاض بخاری، سجاد محمود اور محمد ساجد ٹیم آفیشلز میں شامل ہیں۔

ذرائع کے مطابق برج کے 17 رکنی دستے میں 12 کھلاڑیوں کے ساتھ پانچ ٹیم آفیشلز دستے کا حصہ ہوں گے، باکسنگ میں محمود ریاض اور ارشد حسین، بیڈمنٹن میں زرینہ وقار ٹیم آفیشل ہوں گی۔

ذرائع کا کہنا ہے کہ ٹینس اور ای اسپورٹس کے کھلاڑی بغیر کوچ یا مینجر کے ایونٹ میں شریک ہوں گے۔

ذرائع کا کہنا ہے کہ کراٹے ٹیم میں کوچ احمد سفی کے علاوہ کراٹے فیڈریشن کے دو عہدیدار بطور ٹیم آفیشلز شامل ہیں، عندلیب سندھو اور محمد جہانگیر بطور کراٹے آفیشلز حتمی فہرست میں شامل ہیں۔

اسکواش کے دستے کے ساتھ فہیم گل بطور کوچ سفر کریں گے، تائیکوانڈو پلیئرز کے ساتھ ایران کے یسف کریمی اور کوریا کے سیونگو چوئی بطور کوچ سفر کریں گے۔

ذرائع کے مطابق سابق قومی پلیئر ناجیہ رسول اور شمیم اختر بھی تائیکوانڈو دستے کے آفیشلز میں شامل، وشو فیڈریشن کے سربراہ بھی اپنے کھیل میں بطور آفیشل دستے کا حصہ ہوں گے۔

سوئمنگ فیڈریشن کے احمد علی خان بطور ٹیم آفیشل دستے کا حصہ ہوں گے، اسی طرح عظمیٰ پریٹو بھی سوئمنگ آفیشل ہوں گی۔

ذرائع کے مطابق ہاکی کی فہرست میں سابقہ آفیشلز کے نام شامل ہیں، نئے آفیشلز کے ایکریڈیشن فائنل نہیں ہوئے ہیں۔

ذرائع کا کہنا ہے کہ روئنگ کے بابر اور عادل، شوٹر فرخ ندیم، تائیکوانڈو کے مظہر اور نقش ہمدانی حتمی فہرست میں شامل نہیں۔

بشکریہ جنگ