بہت سے معاشروں میں بعض اجتماعی قدروں کو قابل فخر سمجھا جاتا ہے اور کہا جاتا ہے کہ یہ ان کی ڈی این اے یا سرشت میں پائی جاتی ہیں۔

برطانوی معاشرے میں نام نہاد ’بلٹز سپرٹ‘ پر فخر کیا جاتا ہے، ایک ایسا جذبہ جس کے بارے میں کہا جاتا ہے کہ دوسری جنگ عظیم میں جرمنی کی شدید بمباری کی مہم کے دوران لوگوں میں موجود تھا۔ امریکہ میں لوگ ہمیشہ ذاتی زندگی کی بہتری کے خواہشمند ہوتے ہیں اور اس مقصد کے حصول کے لیے کوشاں رہتے ہیں، جسے ’امریکن ڈریم‘ کہا جاتا ہے۔

کرۂ ارض کے دوسری طرف، ہانگ کانگ کے 74 لاکھ افراد میں سے بہت سے لوگ بھی ایک جذبے پر فخر کرتے ہیں، وہ جذبہ جس کے وہ دعویٰ دار ہیں۔

’لائن (شیر) راک سپرٹ‘ جو ناقابل تسخیر مشکلات کے خلاف اپنی زندگیوں کو بہتر بنانے کے لیے ان کے اجتماعی عزم کو بیان کرتا ہے۔ اس جذبے پر یقین کرنے والوں کا کہنا ہے کہ ہانگ کانگ کے لوگوں کے ذہنوں میں یہ جذبہ کوٹ کوٹ کر بھرا ہوا ہے۔

ہانگ کانگ میں آنے والے ابتدائی لوگ بے سر و سامانی کی حالت میں چین کے جنوبی ساحل کے چھوٹے سے علاقے میں پناہ گزینوں کے طور پر پہنچے تھے، جن کے پاس کچھ بھی نہیں تھا۔ یہ لوگ 1930 اور 60 کی دہائی کے درمیان چین میں بدامنی سے بچ کر اس وقت ہانگ کانگ آ گئے تھے جب یہ علاقہ ابھی برطانوی کالونی تھا۔

یہ بھی پڑھیے

یونان کا وہ گمنام علاقہ جہاں سلطنت عثمانیہ بھی اپنا تسلط قائم نہ کر سکی

زمین پر ’جنت کا مظہر‘ ایران کا وہ جزیرہ جہاں آپ پہاڑ کا ذائقہ چکھ سکتے ہیں

بدتمیزی کی حد تک دوٹوک رویہ رکھنے والا شہر: ’ہمارے بیٹے کی شادی طے ہو گئی ہے، اب رشتے نہ لائیں‘

ہانگ کانگ کے پرانے باسیوں کا اصرار ہے کہ یہ اُن کی مستقل مزاجی اور محنت تھی جس نے صرف ایک نسل میں اُن کے شہر کو عالمی مالیاتی مرکز میں تبدیل کر دیا۔

ہانگ کانگ کی ایک وسیع و عریض پبلک ہاؤسنگ سٹیٹ کے باہر ملنے والے ایک شخص نے ہمیں بتایا کہ ’اس وقت ہم سب کو سخت محنت کرنی پڑی تھی۔‘

’اگر تم نے محنت نہ کی تو تم بھوکے رہو گے، تمہارے بچے بھوکے رہیں گے۔ ہر کوئی اپنے مستقبل کے لیے محنت کر رہا تھا۔’

بریونی ہارڈی وانگ نے کہا کہ ’شیر چٹان روح‘ میرے والدین کی نسل میں ایک عام عقیدہ تھا۔ اُن کی والدہ اور والد 1960 کی دہائی میں چین سے آئے تھے اور ان کی پرورش اسی طرح کی ہاؤسنگ سٹیٹ میں ہوئی تھی۔ ’ان میں سے زیادہ تر معاشی طور پر پسماندہ طبقوں سے آئے تھے۔ ان کو یقین تھا کہ سخت محنت کر کے ہی وہ اپنی سماجی حیثیت کو بہتر کر سکتے ہیں۔‘

ہانگ کانگ میں کمیونیکیشن مینیجر کے طور پر کام کرنے والے ہارڈی وانگ نے لی کا شنگ کے بہت مشہور کیس کا حوالہ دیا، جو 1940 کی دہائی میں اپنے خاندان کے ساتھ جنگ سے فرار ہو کر اور اپنی جلاوطنی میں انتہائی کسمپرسی کے حالات میں یہاں پہنچے تھے۔

تپ دق سے لی کا شنگ کے والد کی موت کا مطلب یہ تھا کہ لی کو 15 سال کی عمر میں سکول چھوڑنے پر مجبور ہونا پڑا اور ایک پلاسٹک ٹریڈنگ کمپنی میں دن میں 16 گھنٹے کام کرنا پڑا۔

ان کو معلوم تھا کہ سخت محنت کر کے ہی وہ، معاشرے میں اپنی حیثیت بنا سکتے ہیں۔ وہ اب ریٹائر ہو چکے ہیں، لی کے بارے میں خیال کیا جاتا ہے کہ وہ ہانگ کانگ کے امیر ترین شخص ہیں۔ ہانگ کانگ کی فی کس آمدنی جرمنی کے برابر ہے۔ فوربز میگزین کے مطابق لی کے اثاثے 35 ارب امریکی ڈالر سے زیادہ ہیں۔ ہارڈی وانگ نے کہا ’لی کا شنگ پرانی نسل کے لیے ہمیشہ ایک مثال ہیں۔‘

1997 سے چین کا ایک خصوصی انتظامی علاقہ، ہانگ کانگ کا پہاڑی علاقہ تین الگ الگ حصوں پر مشتمل ہے، ہانگ کانگ کا جزیرہ، جزیرہ نما کولون کا علاقہ جو وکٹوریہ کی بندرگاہ کے مصروف آبی گزرگاہ کے پار کاعلاقہ ہے اور دیہی علاقہ جو بنیادی طور پر کولون اور چین کے درمیان پھیلا ہوا ہے۔

کینٹونیز زبان میں کوولون کا مطلب ’نو ڈریگن‘ ہے، جو 13ویں صدی کے چینی شہنشاہ کی یاد دلاتا ہے اور جزیرہ نما اور نئے علاقوں کے درمیان آٹھ پہاڑیوں پر مشتمل ایک سلسلہ ہے۔ ’شیر راک‘ ان پہاڑیوں میں سے ایک ہے، اس کی 495 میٹر بلند چوٹی پر ایک بہت بڑا اور مخصوص گرینائٹ کا ابھار ہے جو واقعتاً ایک جھکے ہوئے شیر کی طرح نظر آتا ہے۔

چین سے آنے والے پناہ گزینوں کی زندگی ہانگ کانگ میں ہمیشہ ہی مشکل رہی تھی، لیکن 1945 اور 1951 کے درمیان شہر کی آبادی تین گنا سے زیادہ ہو گئی ہے۔

اس وقت کی برطانوی نوآبادی میں بہت سے مایوس لوگوں کی آمد کے نتیجے میں مکانات کی شدید قلت پیدا ہوئی، جس کے نتیجے میں سینکڑوں ہزاروں لوگ کاؤلون پہاڑیوں کی ڈھلوانوں پر واقع آبادیوں میں بس گئے۔ وہاں انھوں نے انتہائی نامساعد حالت میں زندہ رہنے کے لیے جدوجہد کی، بھوک اور غذائیت کی کمی، ناقص صفائی ستھرائی اور بیماریوں کے پھیلاؤ کے ساتھ ساتھ کام کے لیے انتہائی مسابقت، کم تنخواہ اور مالکان کی طرف سے استحصال کی صورت میں۔

جھونپڑیاں ضائع کردہ لکڑیوں اور تعمیراتی ملبے سے بنائی گئی تھیں، اور یہاں رہنے والے کھلے آسمان تلے آگ پر کھانا پکاتے تھے۔ حادثاتی آتشزدگی ایک بڑا خطرہ تھا، 1953 کے کرسمس کے دن، کوولون کے شیک کیپ میں کچی بستی کےعلاقے میں آگ بھڑک اٹھی، جس نے راتوں رات 53,000 افراد کو بے گھر کر دیا۔

انتظامیہ نے ردعمل میں تیزی سے کام کیا، خوراک اور دیگر ضروریات کی تقسیم اور عارضی پناہ گاہیں تعمیر کیں۔ کچی آبادیوں کو خالی کرنے کے لیے ایک منصوبہ بنایا گیا اور آبادکاری کی عمارتوں کی تعمیر کے لیے ایک فنڈ قائم کیا گیا، جو کہ امدادی رقم سے تعمیر ہونے والے پبلک ہاؤسنگ سوسائٹیز سے پہلے یہاں بنائے گئے تھے اور اس ہی وجہ سے کئی دہائیوں تک ہانگ کانگ کی حکومت دنیا کی سب سے بڑی جاگیردار بن گئی۔

سنہ 1972 تک ایک عظیم عوامی ہاؤسنگ پروگرام کے تحت 18 لاکھ شہریوں، یا اس وقت ہانگ کانگ کی پوری آبادی کے تقریباً 45 فیصد کے لیے سستے گھر فراہم کرنے کا یقین دلایا گیا۔ یہ نئے علاقوں میں نئے قصبوں کی تعمیر اور کولون میں بہت سی کثیر المنزلہ رہائیشی عمارتوں کے ذریعے ممکن بنایا گیا اور وونگ تائی سن، ٹسز وان شان اور وانگ تاؤ ہوم جیسے علاقے وجود میں آئے جو براہ راست شیر پہاڑی کے نیچے واقع ہیں۔

سنہ 1974 میں شروع مںی ’بیلو دی لائن راک‘ کے نام سے ایک ڈرامہ بنایا گیا جس میں کولون کے اس حصے کے پسماندہ لوگوں کی مشکل زندگیوں کو ڈرامائی شکل دی گئی اور یہ ڈرامہ حکومت کے زیر انتظام چینل پر دکھایا گیا۔

کینیڈا کی یونیورسٹی آف برٹش کولمبیا میں ہانگ کانگ سٹڈیز کی اسسٹنٹ پروفیسر ہیلینا وو کے مطابق یہ 1974 میں رپورٹ کیا گیا تھا کہ صرف ایک فیصد مقامی آبادی نے شو دیکھا تھا۔

یہ پروگرام 1979 میں اور بھی زیادہ مقبول ہوا، جس کی وجہ ایک جذباتی گانا بنا جسے بیلو دی لائن راک بھی کہا جاتا ہے، جسے کینٹوپپ کرونر رومن ٹام نے گایا ہے۔

ہانگ کانگ یونیورسٹی میں ہانگ کانگ کی تعلیم کے لیکچرر ڈاکٹر میگی لیونگ نے کہا کہ ’یہ گانا 2002 سے عوام کے اجتماعی شعور کا حصہ بن گیا، جب اس وقت کے مالیاتی سیکریٹری اینٹونی لیونگ نے اپنے بجٹ خطاب میں گانے کے بولوں کا حوالہ دیا۔‘

مزید پڑھیے

’انڈیا کا سندھ‘ جہاں رہنے والوں کی کاروباری ذہانت پر باقاعدہ تحقیق کی گئی

افریقہ میں ’جہنم کا دروازہ‘ جس کے متعلق کئی پراسرار کہانیاں مشہور ہیں

السلط: رواداری اور مہمان نوازی کی روایت کا امین ’عثمانی شہر‘

انھوں نے کہا کہ اس وقت مالیاتی بحران اور سارس کی وبا کی وجہ سے شہر کی معیشت بری طرح متاثر ہوئی اور شہریوں سے اپنے بجٹ کی حمایت کرنے کی اپیل میں ’لیونگ نے اس گانے کو ہانگ کانگ کی معاشی کامیابی کی یادیں تازہ کرنے کے لیے استعمال کیا جو کہ ایک غیر شکایتی، ثابت قدم اور محنتی لوگ جنہوں نے ایک دوسرے کا ساتھ دیا۔‘

اس کے بعد سے کئی سیاستدانوں نے جب بھی ہانگ کانگ میں حوصلے بلند کرنے کی ضرورت محسوس کی ہے تو اس گانے کا استعمال کیا ہے۔ 2002 میں بھی، ژو رونگجی، جو اس وقت کے چین کے وزیر اعظم تھے، نے ہانگ کانگ کے لیے اقتصادی مدد کا وعدہ کرتے ہوئے ایک تقریر میں بیلو دی لائن راک کے بول شامل کیے تھے۔

یہ شاید سب سے زیادہ ڈرامائی طور پر اس وقت ظاہر ہوا جب 2014 کے جمہوریت نواز امبریلا موومنٹ کے احتجاج کے دوران سیاسی کارکنان حق رائے دہی کا ایک جرات مندانہ مطالبہ کرنے کے لیے چٹان پر چڑھ گئے۔ اور جب ان کے ہزاروں مشعل بردار ساتھیوں نے 2019 میں شہر کو اپنی لپیٹ میں لینے والے حکومت مخالف مظاہروں کے دوران اس کے سربراہی اجلاس سے ایک چشم کشا اشارہ کیا۔

اس قسم کی ناانصافی کے خلاف لڑنا، مشکلات میں طاقت، حقیقی شیر راک روح ہے۔

لیونگ نے کہا کہ ’2014 میں امبریلا احتجاجی تحریک کے دوران ایک بہت بڑے بینر کا لٹکایا جانا۔۔۔ اور ساتھ ہی 2019 کے احتجاج میں انسانی زنجیر بنانا، شیر راک کی علامتی اہمیت کا ثبوت ہے۔‘

’ہم سوچتے ہیں کہ شیر راک کی روح صرف پیسے کے متعلق نہیں ہے‘ بینر کے پیچھے ایک گمنام نوجوان نے ویڈیو فوٹیج میں کہا ‘اس قسم کی ناانصافی کے خلاف لڑائی حقیقی شیر راک کی روح ہے۔‘

حالیہ دہائیوں میں ہانگ کانگ کے متوسط طبقے کی ڈرامائی ترقی، اور اعلیٰ تعلیم مکمل کرنے والے نوجوانوں کی تعداد میں اضافے کا مطلب ہے کہ شیر راک سپرٹ سے کچھ نیا ہونے والا ہے۔ ہارڈی وونگ نے کہا کہ ’سماجی و اقتصادی صورتحال بدل گئی ہے (اور) شیر راک اسپرٹ کا 1970 کا تصور اب قابل عمل نہیں ہے۔‘

خلاصہ یہ ہے کہ بیلو دی لائن راک کی تھیم کے بول کہتے ہیں کہ زندگی میں ہمیشہ جدوجہد ہوتی رہے گی، ہانگ کانگ کے لوگ اپنے اختلافات کو ایک طرف رکھ کر اور ایک دوسرے کا ساتھ دے کر اپنی زندگیوں کو بہتر بنا سکتے ہیں۔ سب کے سب، ایک ہی کشتی میں سوار ہیں، اور یہ یکجہتی اب بھی بہت سے لوگوں کے لیے برقرار ہے۔

ہارڈی وونگ نے کہا کہ ’ڈاکٹر اور وکیل جیسے روایتی اچھے پیشے اب وہ کیریئر نہیں رہے جو [نوجوان نسل] کا پیچھا کرتے ہیں۔‘ ’لہذا، لائین راک سپرٹ کو اب سماجی تناظر میں زیادہ استعمال کیا جاتا ہے، خاص طور پر 2019 میں سماجی تحریک کے بعد، جب لوگوں نے ایک ہی اقدار کا اشتراک کیا، اپنی رائے اور مطالبات کو آواز دینے کے لیے، ایک منصفانہ اور مساوی معاشرے کے لیے جدوجہد کرنے کے لیے۔‘