ایاز امیر پر حملہ، وزیر داخلہ نے ملزمان کی گرفتاری کی یقین دہانی کرادی

وفاقی وزیر داخلہ رانا ثناء اللّٰہ نے سینئر صحافی ایاز امیر پر لاہور میں حملے کے واقعے کی شدید مذمت کرتے ہوئے کہا ہے کہ نامعلوم حملہ آوروں کو ”معلوم“ کرنے کے لئے پنجاب حکومت سے پورا تعاون کریں گے۔

وزیر داخلہ نے ایاز امیر سے اظہارِ ہمدردی کرتے ہوئے ملزمان کی گرفتاری اور سخت قانونی کارروائی کی یقین دہانی بھی کرائی ہے۔

رانا ثناء اللّٰہ کا کہنا ہے کہ تنقید پر تشدد کا خود نشانہ بن چکے ہیں، ایسے واقعات کو برداشت نہیں کیا جاسکتا، آئین میں ضمانت کردہ شہری حقوق اور اظہار کی آزادیوں کے حامی اور اُن پر مکمل یقین رکھتے ہیں۔

وفاقی وزیر داخلہ نے کہا کہ ایاز امیر قابل احترام شہری ہیں، ان کے ساتھ رونما ہونے والے واقعے پر دلی افسوس ہے۔

سابق وزیر اعظم نے کہا کہ جب ریاست اخلاقی بالا دستی کھو دیتی ہےتو تشدد پر اتر آتی ہے۔

واضح رہے کہ لاہور کے علاقے ایبٹ روڈ پر سینئر صحافی ایاز امیر پر نامعلوم افراد نے تشدد کر کے ان کا موبائل فون اور پرس بھی چھین لیا تھا۔

بشکریہ جنگ