اگر ٹیم مینجمنٹ میں ہوتا تو شاہین کو انجکشن لگا کر اس کا گھٹنہ سن کردیتا، شعیب اختر

پاکستان کے سابق ٹیسٹ کرکٹر شعیب اختر نے شاہین شاہ آفریدی کے ان فٹ ہونے کے معاملے پر  کہا کہ اگر وہ ٹیم مینجمنٹ میں ہوتے تو شاہین آفریدی کو انجکشن لگا کر اس کا گھٹنہ سن کردیتا۔

انگلینڈ کے ہاتھوں ٹی ٹوئنٹی ورلڈکپ کے فائنل میں شکست کے بعد شعیب اختر نے اپنے ٹوئٹر پیغام میں دل ٹوٹنے کا ایموجی شیئر کیا۔

فوٹوز اینڈ ویڈیوز شیئرنگ ایپ انسٹا گرام پر اپنے ویڈیو پیغام میں شعیب اختر نے کہا کہ شاہین شاہ آفریدی کا ان فٹ ہونا ہمارا ٹرننگ پوائنٹ تھا۔

شعیب اختر نے اپنے پیغام میں کہا کہ میں اگر ٹیم مینجمنٹ میں ہوتا تو شاہین آفریدی کو انجکشن لگا کر ان کا گھٹنہ سن کردیتا، پھر اسے کہتا کہ اوور سے پہلے ایک دو بال سائیڈ پر کرواکر دیکھیں کیسا محسوس کر رہے ہیں۔

انہوں نے کہا کہ اگر انہیں درد ہوتا تو چھوڑ دیتا اور کبھی ان سے بولنگ نہیں کرواتا، کیونکہ کسی کا کیریئر داؤ پر نہیں لگانا، خیر ہے ورلڈکپ آتے جاتے رہیں گے۔

واضح رہے کہ ٹی ٹوئنٹی ورلڈکپ 2022 کے فائنل میں پاکستان کو 5 وکٹوں سے شکست دے کر انگلینڈ عالمی چیمپئن بن گیا۔

بشکریہ جنگ