اکاؤنٹس کی چھان بین کی درخواست، PTI کو تضادات درست کرنے کی ہدایت

سیاسی جماعتوں کے اکاؤنٹس کی چھان بین کے سلسلے میں پی ٹی آئی کے سیکریٹری جنرل عامر محمود کیانی کی درخواست پر سماعت کے دوران الیکشن کمیشن آف پاکستان نے تحریک انصاف کو تضادات درست کرنے کی ہدایت کر دی۔

ممبر الیکشن کمیشن نثار احمد درانی اور شاہ محمد جتوئی پر مشتمل 2 رکنی بنچ نے کیس کی سماعت کی۔

نثار درانی نے دورانِ سماعت کہا کہ پولیٹیکل فنانس ونگ کے مطابق پی ٹی آئی کی پہلی درخواست اور بعد میں دی گئی درخواستوں میں تضاد ہے۔

انہوں نے بتایا کہ سیاسی جماعتوں کے خلاف پی ٹی آئی کی پہلی درخواست اور بعد میں دی گئی اعتراضات پر مبنی درخواستوں میں بھی تضاد ہے۔

ممبر الیکشن کمیشن نثار احمد درانی نے عامر محمود کیانی کو ہدایت کی کہ آپ ان تضادات کو درست کریں۔

الیکشن کمیشن کے مطابق اب تک صرف 6 سیاسی جماعتوں نے پی ٹی آئی کی درخواست پر جواب جمع کرایا ہے، ان جماعتوں میں پی ٹی آئی خود، جمعیت علمائے اسلام ف، بلوچستان عوامی پارٹی، بی این پی عوامی، پختون خوا ملی عوامی پارٹی، جمہوری وطن پارٹی شامل ہیں۔

الیکشن کمیشن نے کیس کی سماعت 21 ستمبر تک ملتوی کر دی۔

واضح رہے کہ پی ٹی آئی نے 19 سیاسی جماعتوں کے اکاؤنٹس کی چھان بین کرنے کی درخواست الیکشن کمیشن میں جمع کرائی تھی، جن پر الیکشن کمیشن نے 16 جماعتوں کو نوٹس جاری کیئے تھے۔

الیکشن کمیشن کی ہدایت پر پی ٹی آئی نے تمام سیاسی جماعتوں کے خلاف علیحدہ علیحدہ اعتراضات جمع کرائے تھے۔

بشکریہ جنگ