اپوزیشن کا موجودہ سیاسی صورتحال پر سخت ردعمل دینے پر غور

ذرائع کا کہنا ہے کہ متحدہ اپوزیشن کی جانب سے موجودہ سیاسی صورتحال پر سخت ردعمل دینے پر غور کیا جارہا ہے۔

ذرائع نے کہا کہ متحدہ اپوزیشن نے عدالتی فیصلے کے انتظار کی بجائے سڑکوں پر آنے پر مشاورت کی ہے، مشاورت میں آصف زرداری، شہباز شریف، مولانا فضل الرحمٰن سمیت دیگر رہنما شامل تھے۔

سابق صدر آصف علی زرداری نے مرحلہ وار حکومت مخالف تحریک شروع کرنے کی تجویز دی ہے۔

آصف زرداری نے تجویز دی ہے کہ پہلے مرحلے میں صوبائی سطح پر عوامی احتجاج کیا جائے جبکہ دوسرے مرحلے میں عوام کو اسلام آباد اکٹھا کیا جائے، سابق صدر کی تجاویز پر متحدہ اپوزیشن رہنماؤں نے اتفاق کیا۔

ذرائع کا یہ بھی کہنا ہے کہ موجوہ صورتحال کے پیش نظر متحدہ اپوزیشن نے گرینڈ اجلاس طلب کرنے کا فیصلہ بھی کیا ہے، جو رواں ہفتے ہی طلب کیے جانے کا امکان ہے۔

گرینڈ اجلاس سے مسلم لیگ ن کے قائد، سابق وزیر اعظم نواز شریف بھی خطاب کریں گے۔

بشکریہ جنگ