اپوزیشن کا حکومتی قانون سازی پر سپریم کورٹ سے رجوع کرنے کا فیصلہ

اپوزیشن نے حکومتی قانون سازی پر سپریم کورٹ سے رجوع کرنے کا فیصلہ کرلیا۔

اپوزیشن کی اسٹیئرنگ کمیٹی کا پارلیمنٹ ہاؤس میں اجلاس ہوا، جس میں اہم ٹاسک کمیٹی کے سپرد کیا گیا۔

ذرائع کے مطابق اجلاس میں فیصلہ کیا گیا کہ حکومت نے انتخابی اصلاحات اور نیب قوانین زبردستی پاس کرائے تو سپریم کورٹ سے رجوع کیا جائے گا۔

پیپلز پارٹی کے سینئر رہنما قمر زمان کائرہ نے اپوزیشن کی سب سے بڑی جماعت مسلم لیگ (ن) سے بیک ڈور رابطے ختم کرنے کا کہہ دیا۔

اجلاس میں فیصلہ کیا گیا کہ پارلیمنٹ کے مشترکہ اجلاس میں اپوزیشن ارکان کے نمبر پورے کرنا اسٹیئرنگ کمیٹی کی اولین ذمے داری ہوگی۔

حکومت کے خلاف اپوزیشن کی نئی حکمت عملی کی تیاری کے لیے قائد حزب اختلاف شہباز شریف نے سب کو عشائیے پر بلالیا۔

وفاقی وزیر اطلاعات فواد چوہدری نے اپوزیشن کو پہلے اپنے پاؤں پر کھڑا ہونا سیکھنے کا مشورہ دیا اور کہا کہ ہر وقت سازش کرکے کامیاب نہیں ہوسکتے۔

عشائیے میں بلاول بھٹو زرداری سمیت اپوزیشن جماعتوں کے نمائندے سر جوڑ کر بیٹھیں گے۔

شہباز شریف نے عشائیے میں شرکت کے لیے بلاول بھٹو، اسعد محمود، امیر حیدر خان ہوتی سمیت دیگر اپوزیشن رہنماؤں کو دعوت دی ہے۔

بشکریہ جنگ