اپوزیشن کا اکٹھا ہونا ضروری ہے، مصطفیٰ کھوکھر

پیپلز پارٹی کے رہنما مصطفیٰ نواز کھوکھر کا کہنا ہے کہ نوٹیفکیشن والے معاملے کے بعد ایسی صورتِ حال پیدا ہوئی ہے، جس کے بعد شاید اُس طرح کا ایک صفحہ نہیں رہا۔

جیو نیوز کے پروگرام آج شاہ زیب خان زادہ کے ساتھ میں گفتگو کرتے ہوئے مصطفیٰ نواز کھوکھر نے کہا کہ اگر اپوزیشن اکٹھی نہیں ہوگی اور انتظار کرتی رہے گی کہ ان کے کان میں کوئی آکر کچھ پھونکے گا تو ایسا نہیں ہوگا۔

مصطفیٰ نواز کھوکھر کا کہنا تھا کہ حالیہ انتخابی نتائج کے بعد جہاں بھی ممکن ہو ہمیں آگے بڑھ کر حکومت کو ٹف ٹائم دینا چاہیے، اس سے پتا چل جائے گا کہ ادارے کتنے غیر جانب دار ہیں۔

انہوں نے مزید کہا کہ اتحادی اگر حکومت سے الگ نہ ہوئے تو انہیں بھی عوام کے غیض و غضب کا سامنا کرنا پڑے گا۔

پروگرام میں وزیر مملکت برائے پارلیمانی امور علی محمد خان کا کہنا تھا کہ مولانا فضل الرحمان نے کہہ دیا کہ انہیں کسی کی سپورٹ نہیں ہے، اب اگر پی ٹی آئی دوبارہ جیت گئی تو پھر وہ کیا کہیں گے؟۔

علی محمد خان کا کہنا تھا کہ بلدیاتی انتخابات میں شکست پی ٹی آئی کے لیے خطرے کی گھنٹی ہے، ساتویں آسمان میں نہیں اُڑ رہے، مہنگائی کا احساس ہے۔

علی محمد خان نے مزید کہا کہ بلدیاتی الیکشن میں عام انتخابات والا جذبہ نہیں ہوتا۔ 2023 میں تحریک انصاف دو تہائی اکثریت حاصل کرے گی۔

بشکریہ جنگ