آسٹریلوی کرکٹر فواد احمد ایک بار پھر پی ایس ایل کا حصہ بننے پر خوش

پاکستانی نژاد آسٹریلوی کرکٹر فواد احمد پا کستان سپر لیگ (پی ایس ایل) کا ایک بار پھر حصہ بننے خوش ہیں۔

لاہور میں جیو نیوز سے گفتگو میں فواد احمد نے کہا کہ ایک بار پھر پی ایس ایل کا حصہ بننے پر خوش ہوں، لاہورقلندرز کا کامبی نیشن اچھا بنا ہے، امید ہے رزلٹ بھی اچھے ہوں گے۔

انہوں نے کہا کہ آسٹریلین ٹیم کے دورہ پاکستان پر کافی خوش ہوں، پاکستان کرکٹ بورڈ (پی سی بی) کراچی اور لاہور کے اسٹیڈیمز کی گنجائش بڑھائے تو اور مزہ آئے گا۔

آسٹریلوی کرکٹر نے مزید کہا کہ بگ بیش لیگ (بی بی ایل) میں اچھا کھیلا تھا، امید ہے سلسلے کو جاری رکھوں گا، ہر لیگ اپنی جگہ پر اچھی ہوتی ہے، پی ایس ایل کی خاص بات یہ ہے کہ یہاں کرکٹ کا معیار بہت اعلیٰ ہے۔

انہوں نے کہا کہ کم ٹیمیں، غیر ملکی اور مقامی کھلاڑیوں کا کامبی نیشن اس لیگ کو قابل دید بناتا ہے، کراچی اور لاہور میں 25، 30 ہزار کی گنجائش ہونا کم ہے، ان اسٹیڈیمز میں 50 سے 60 ہزار تماشائیوں کے بیٹھنے کی گنجائش ہونی چاہیے۔

فواد احمد نے یہ بھی کہا کہ بگ بیش میں آسٹریلین کرکٹرز سیکیورٹی اور کنڈیشن کے بارے میں معلوم کرتے رہے، میں نے آسٹریلین کرکٹرز اور بورڈ حکام کو بتایا کہ یہاں سیکیورٹی کتنی اچھی ہے وہ خود کو کتنا محفوظ سمجھ سکتے ہیں۔

ان کا کہنا تھا کہ پلیئرز کو بتایا کہ پاکستان میں سیکیورٹی بہت سخت ہوتی ہے، کوئی مسئلہ نہیں ہوتا، دورے سے قبل پلیئرز کے سوالات ہونا فطری بات ہے۔

آسٹریلوی کرکٹر نے کہا کہ فل اسٹرینتھ آسٹریلین ٹیم کا پاکستان آنا بہت بڑی بات ہے، دونوں ٹیموں کے لیے سیریز کافی اہم ہے، میری نظر میں پاکستان اور آسٹریلیا کے درمیان کافی اچھے مقابلے ہوں گے۔

بشکریہ جنگ