آرمی چیف کا کراچی کور کی آپریشنل تیاریوں پر اظہارِ اطمینان

آرمی چیف جنرل قمر جاوید باجوہ نے کور ہیڈ کوارٹرز کراچی کا دورہ کیا جہاں انہیں سندھ خصوصاً کراچی میں سیکیورٹی صورتِ حال پر بریفنگ دی گئی، جبکہ آرمی چیف نے کراچی کور کی آپریشنل تیاریوں پر اطمینان کا اظہار کیا۔ 

پاک فوج کے شعبہ تعلقات عامہ آئی ایس پی آر کے مطابق آرمی چیف کو کراچی میں سیکیورٹی صورتِ حال اور کراچی ٹرانسفارمیشن پلان پر عملدرآمد میں سول انتظامیہ کی معاونت سے متعلق بریفنگ بھی دی گئی۔

آرمی چیف کو کراچی میں اربن فلڈنگ سے تحفظ کی کاوشوں اور شہری سہولتوں کے موجودہ انفرا اسٹرکچر میں بہتری کی کوششوں سے بھی آگاہ کیا گیا۔

اس موقع پر جنرل قمر جاوید باجوہ نے کور کی آپریشنل تیاریوں اور داخلی سلامتی یقینی بنانے کے اقدامات پر اطمینان کا اظہار کیا۔

انہوں نے قیامِ امن کے لیے سندھ رینجرز کی خدمات اور قربانیوں کو بھی سراہا۔

آرمی چیف نے کراچی ٹرانسفارمیشن پلان کے نفاذ میں تمام اسٹیک ہولڈرز کی ہم آہنگی کی کوششوں کو سراہا۔

بعدازاں آرمی چیف جنرل قمر جاوید باجوہ نے سندھ پولیس کے ہیڈکوارٹرز کا دورہ کیا اور یادگارِ شہدا پر پھول چڑھائے۔

انہوں نے سیکیورٹی صورتِ حال کی بہتری میں سندھ پولیس کے کردار کو سراہا، پولیس کے شہدا کے اہل خانہ سے بات کی اور انہیں پاک فوج کی ہر ممکن حمایت کا یقین دلایا۔

بشکریہ جنگ