اومی کرون کا سب ویرینٹ پاکستان پہنچنے کا امکان

عالمی ادارہ صحت کا کہنا ہے کہ اومی کرون ویرینٹ کا سب ویرینٹ بی اے ٹو دیگر ممالک میں تیزی سے پھیل رہا ہے، جلد یا بدیر پاکستان پہنچنے کےقومی امکانات ہیں۔

کورونا کی سائنٹیفک ٹاسک فورس کے رکن ڈاکٹرجاوید اکرم کا کہنا ہے کہ سب ویرینٹ بی اے ٹو اومی کرون ویرینٹ تیزی سے پھیلنےاور منتقل ہونے والا ویرینٹ ہے، بی اےٹو کم از کم 69 ممالک میں پھیل چکا ہے تاہم اچھی خبر یہ ہے کہ بی اے ٹو کیخلاف تمام کورونا ویکسین موثر ہیں۔

ڈاکٹر جاوید اکرم کا کہنا ہے کہ اومی کرون ویرینٹ کے سب ویرینٹ بی اےٹو، کےبارے میں فی الحال نہیں کہا جاسکتا کہ اس کی منتقلی یا پھیلاؤ کی رفتار کیا ہے۔

انہوں نے کہا کہ اس بات کا قوی امکان ہے کہ مستقبل میں کورونا وائرس کی نئی اقسام کا سامنا کرنا پڑ سکتا ہے۔

ڈاکٹرجاوید اکرم کا مزید کہنا ہے کہ لوگوں کو یہ نہیں بھولنا چاہیے کہ بیماری صرف کم ہوئی ہے مگر ابھی ختم نہیں ہوئی، اس لیے معیاری آپریٹنگ طریقہ کار پر سختی سے عمل کرنا چاہیے کیونکہ وائرس دوبارہ واپس آ سکتا ہے۔

بشکریہ جنگ