انگور کے برابر دنیا کا سب سے چھوٹا ٹیلی ویژن

دنیا میں جہاں اب ہم موبائل جیسی چھوٹی اسکرینز کے ساتھ ساتھ پروجیکٹر کی صورت میں بڑی اسکرینز بھی دیکھ رہے ہیں ایسے میں ایک کمپنی نے ٹیلی ویژن کو لے کر نئی سمت اختیار کرلی اور انگور کے برابر کا ٹیلی ویژن بناڈالا۔ 

غیر ملکی میڈیا کی رپورٹ کے مطابق ٹائنی سرکٹس نامی ایک الیکٹرونکس کمپنی نے دنیا کا سب سے چھوٹا ٹیلی ویژن بنایا ہے جو ایک عام موبائل کی اسکرین سے بھی بہت چھوٹا ہے۔ 

اس ٹیلی ویژن کے بارے میں کمپنی نے یہ دعویٰ کیا ہے کہ یہ دنیا کا سب سے چھوٹا ٹیلی ویژن ہے جس میں ایک بڑے ٹیلی ویژن کی تقریباً تمام ہی خصوصیات موجود ہیں۔ 

اس چھوٹے ٹیلی ویژن پر نہ صرف تمام مطلوبہ بٹن لگے ہوئے ہیں بلکہ اس کے ساتھ ان کا ریمورٹ کنٹرول بھی موجود ہے جس کی مدد سے اس کے چینلز تبدیل کیے جاسکتے ہیں۔ 

ٹیلی ویژن میں آواز کے لیے اسپیکر بھی موجود ہے، آواز کو کنٹرول کیا جاسکتا ہے جبکہ یہ ایک پرانے ٹیلی ویژن کی طرح ایک اسٹینڈ پر رکھا جاسکتا ہے۔ 

کمپنی کی جانب سے بنائے گئے ٹیلی ویژن کی اسکرین کا احاطہ تقریباً صفر اعشاریہ 6 انچ یعنی 15 ملی میٹر کا ہے جبکہ فریم کے ساتھ مکمل حجم ایک انچ تک ہے۔ 

اس میں ایک بیٹری نصب ہے جو ایک مرتبہ چارج کرنے پر اسے تقریباً ایک گھنٹے تک چلاسکتی ہے۔ 

اس ٹیلی ویژن پر براہِ راست نشریات یو ایس بی-سی کیبل کے ذریعے کمپیوٹر سے منسلک کرکے دیکھی جاسکتی ہیں۔ 

اسی طرح اس ٹیلی ویژن میں ایک 8 گیگا بائٹ (جی بی) کا مائیکرو ایس ڈی کارڈ موجود ہے جس میں 10 سے 40 گھنٹوں کی فوٹیج محفوظ کی جاسکتی ہیں۔ 

بشکریہ جنگ