یوکرین پر حملے کے بعد بین الاقوامی پابندیوں کے باوجود انڈیا کو سب سے زیادہ تیل فروخت کرنے والے ممالک کی فہرست میں روس، سعودی کو پیچھے چھوڑ کر دوسرا بڑا ملک بن گیا ہے۔ عراق اب بھی پہلے نمبر پر ہے۔ دوسری طرف پاکستان حکومت نے ابھی تک روس سے کوئی باقاعدہ تیل خریدنے کا معاہدہ نہیں کیا ہے۔

خبر رساں ادارے روئٹرز کے مطابق روس سے رعایتی نرخوں پر تیل لینے والی انڈین ریفائنری نے مئی کے مہینے میں ہی 25 ملین بیرل تیل درآمد کیا جو کل درآمدات کا 16 فیصد ہے۔

رواں سال اپریل میں سمندر کے ذریعے انڈیا میں خام تیل کی کل درآمدات میں روس کا حصہ پانچ فیصد رہا، جو کہ پچھلے پورے سال اور سنہ 2022 کی پہلی سہ ماہی میں ایک فیصد سے بھی کم تھا۔

دنیا کا تیسرا سب سے بڑا تیل درآمد کرنے والا ملک انڈیا، یوکرین پر حملے کے بعد روس پر عائد پابندیوں کے درمیان روس سے سستے نرخوں پر تیل خریدنے کے اپنے فیصلے کا مسلسل دفاع کر رہا ہے۔

گذشتہ ماہ تیل کی وزارت نے کہا تھا کہ روس سے درآمد کردہ تیل کی مقدار انڈیا کی کل کھپت میں بہت کم حصہ ڈالتی ہے۔

وزیر خارجہ ایس جے شنکر نے بین الاقوامی میڈیا پر یہ بھی واضح کیا تھا کہ انڈیا جتنا تیل روس سے خرید رہا ہے، یورپ ایک دن سے بھی کم وقت میں اتنا خریدتا ہے۔ انڈیا مسلسل یہ کہہ رہا ہے کہ روس سے تیل خرید کر وہ کسی پابندی کی خلاف ورزی نہیں کر رہا ہے۔

مئی کے مہینے میں انڈیا کو تیل برآمد کرنے والے ممالک میں عراق پہلے نمبر پر تھا جبکہ روس دوسرے نمبر پر اور اب سعودی عرب تیسرے نمبر پر آگیا ہے۔

دریں اثنا پاکستان میں روس کے سفیر دانیلہ گنیچ نے اتوار کو ایک مقامی چینل کو انٹرویو دیتے ہوئے کہا تھا کہ ’میں اس بات کی تصدیق کرتا ہوں کہ پاکستان کے ساتھ سستی گندم اور تیل بیچنے پر کسی مفاحمت کی یادداشت (میمورینڈم آف انڈرسٹینڈنگ) پر دستخط نہیں ہوئے ہیں۔‘

دوسری طرف انڈیا امریکہ اور چین کے بعد تیل کی کھپت کے معاملے میں دنیا کا تیسرا سب سے بڑا ملک ہے اور وہ اپنا 85 فیصد تیل دوسرے ممالک سے درآمد کرتا ہے۔

یوکرین پر حملے کو 100 سے زائد دن گزر چکے ہیں اور عالمی پابندیوں کے باوجود روس نے تیل برآمد کرکے پہلے سے زیادہ کمایا ہے۔

ایک رپورٹ کے مطابق روس نے یوکرین پر حملے کے بعد پہلے 100 دنوں میں صرف تیل اور گیس کی برآمدات سے تقریباً 100 بلین ڈالر (7800 ارب روپے) کمائے ہیں۔

سینٹر فار ریسرچ آن انرجی اینڈ کلین ایئر (سی آر ای اے) نامی ایک آزاد تنظیم نے اپنی رپورٹ میں کہا ہے کہ تمام تر پابندیوں کے درمیان مارچ سے روس کی آمدنی میں کمی آئی ہے لیکن یہ اب بھی اپنی بلند ترین سطح پر برقرار ہے۔

رپورٹ میں روس سے درآمدات کو کم کرنے یا روکنے کے مقصد سے لگائی گئی پابندیوں میں موجود خامیوں کے بارے میں بھی معلومات دی گئی ہیں۔

یورپی یونین، امریکہ اور برطانیہ ان ممالک میں شامل ہیں جنھوں نے روس سے درآمدات مکمل طور پر روکنے کا عہد کیا ہے۔

سی آر ای اے رپورٹ میں کیا ہے؟

سی آر ای اے نے اطلاع دی ہے کہ روس نے یوکرین پر حملے کے پہلے 100 دنوں کے اندر ایندھن بیچ کر 97 بلین ڈالر کمائے۔ یہ اعداد و شمار 24 فروری سے 3 جون تک کے ہیں۔

اس میں سے 61 فیصد درآمدات صرف یورپی یونین کے رکن ممالک نے کی ہیں جو کہ تقریباً 59 بلین ڈالر بنتی ہے۔

تاہم مارچ کے مقابلے میں روس کی تیل اور گیس کی کل برآمدات اور اس کی آمدنی میں کمی آئی ہے۔ مارچ میں روس تیل اور گیس کی برآمدات سے ایک دن میں ایک بلین ڈالر سے زیادہ کما رہا تھا۔

یہ بھی پڑھیے

روسی تیل پر عالمی پابندیاں: کیا دنیا روس کے تیل اور گیس کے بغیر گزارا کر پائے گی؟

انڈیا روس سے رعایتی نرخوں پر کتنا تیل درآمد کر رہا ہے اور کیا پاکستان ایسا کر سکتا ہے؟

لیکن یہ آمدنی اس سے بھی زیادہ ہے جو روس یوکرین کی جنگ پر ایک دن میں خرچ کر رہا ہے۔ سی آر ای اے کی رپورٹ میں یہ اندازہ لگایا گیا ہے کہ روس یوکرین کے خلاف جنگ میں روزانہ 876 ملین ڈالر خرچ کر رہا ہے۔

انڈیا تیل کہاں کہاں سے حاصل کرتا ہے؟

مزید ممالک روس سے توانائی کی درآمدات کم کریں گے

یورپی یونین نے 2022 کے آخر تک سمندری راستے سے روس کی تیل کی درآمدات کو مکمل طور پر روکنے کا فیصلہ کیا ہے۔ یورپی یونین روس سے کل درآمدات کو دو تہائی کم کرنے کا ارادہ رکھتی ہے۔

دوسری جانب امریکہ نے روس سے تیل، گیس اور کوئلے کی درآمدات مکمل طور پر روکنے کا اعلان کیا ہے۔ ساتھ ہی برطانیہ نے بھی رواں سال کے آخر تک روس سے توانائی کی درآمدات مرحلہ وار کم کرنے کا فیصلہ کیا ہے۔

یہ بھی پڑھیے

دو ‘قدرتی ہتھیار’ جو روس یورپی ممالک کے خلاف استعمال کر سکتا ہے

انڈیا میں تیل کی قیمت میں کمی کی وجہ روسی تیل ہے؟

سی آر ای اے کی رپورٹ میں کہا گیا ہے کہ یورپی یونین کی جانب سے روسی تیل کی درآمدات پر پابندیاں عائد کرنے کا منصوبہ اس کے نفاذ پر بہت زیادہ اثر ڈالے گا۔

رپورٹ میں بتایا گیا ہے کہ یورپی یونین کی پابندیوں کے باعث روس کی آمدنی میں سالانہ تقریباً 36 ارب ڈالر کی کمی ہو سکتی ہے۔

‘انڈیا کو بڑی مقدار میں تیل بھیجا جا رہا ہے’

رپورٹ میں یہ بھی بتایا گیا ہے کہ اب روسی تیل کثیر مقدار میں انڈیا بھیجا جا رہا ہے۔ اس سے پہلے انڈیا کے کل درآمد شدہ تیل کا صرف ایک فیصد روس سے آتا تھا لیکن رواں سال مئی میں یہ مقدار 18 فیصد تک پہنچ گئی ہے۔

سی آر ای اے کی رپورٹ کے مطابق روس سے انڈیا آنے والے تیل کا ایک بڑا حصہ امریکہ اور یورپ کے صارفین کو ریفائن کر کے فروخت کیا جا رہا ہے۔ اس کو بھی رپورٹ میں پابندیوں کی ایک بڑی خامی قرار دیا گیا ہے۔

رپورٹ کے مطابق روسی خام تیل لے جانے والے ٹینکرز پر سخت پابندیاں ممکنہ طور پر ایسے معاملات کو روکنے میں مددگار ثابت ہوں گی۔

رپورٹ میں یہ بھی بتایا گیا ہے کہ روس اب اپنے تیل کے لیے نئی منڈیوں کی تلاش میں ہے۔ ان میں سے زیادہ تر مقدار وہ جہاز کے ذریعے ہی ایک جگہ سے دوسری جگہ بھیج رہا ہے۔ رپورٹ میں اس بات کی بھی نشاندہی کی گئی ہے کہ زیادہ تر بحری جہاز امریکی یا یورپی کمپنیوں کی ملکیت ہیں۔

سی آر ای اے نے اطلاع دی ہے کہ زیادہ سے زیادہ تیل انڈیا کو ریفائننگ کے لیے بھیجا جا رہا ہے اور ان میں سے کچھ ریفائنڈ مصنوعات یورپی منڈیوں میں واپس آ رہی ہیں۔ چونکہ یورپی یونین کی پابندیاں زیادہ تر مصنوعات کا احاطہ نہیں کرتی ہیں، اس لیے رپورٹ میں اسے ایک خرابی قرار دیا گیا ہے۔

انڈیا کے ساتھ ساتھ روس سے ایندھن کی درآمدات بڑھانے والے ممالک میں فرانس، چین، متحدہ عرب امارات اور سعودی عرب شامل ہیں۔

کس کے پاس کتنا تیل ہے؟

سنہ 2016 میں رائسٹڈ انرجی کی ایک رپورٹ آئی تھی جس میں بتایا گیا تھا کہ امریکہ کے پاس 264 بلین بیرل تیل کے ذخائر ہیں۔

اس میں تیل کے موجودہ ذخائر، نئے منصوبے، حال ہی میں دریافت ہونے والے تیل کے ذخائر اور تیل کے کنویں شامل ہیں جو ابھی دریافت ہونا باقی ہیں۔

اس رپورٹ میں بتایا گیا ہے کہ امریکہ کے پاس روس اور سعودی عرب سے زیادہ تیل کے ذخائر ہیں۔

رائسٹڈ انرجی کے اندازوں کے مطابق روس میں 256 بلین بیرل، سعودی عرب میں 212 بلین بیرل، کینیڈا میں 167 بلین بیرل، ایران میں 143 اور برازیل میں 120 بلین بیرل تیل موجود ہے۔