انڈر19 ایشیا کپ: سیمی فائنل میں پاکستان کو سری لنکا کے ہاتھوں شکست

انڈر19 ایشیاکپ کے سیمی فائنل میں سری لنکا نے پاکستان کو 22 رنز سے ہرا دیا، 148 رنز کے تعاقب میں پاکستان جونئیر ٹیم 125 رنز بناکر آؤٹ ہوگئی۔ دوسرے سیمی فائنل میں بھارت نے بنگلا دیش کو 103 رنز سے ہرا کر فائنل کے لیے کوالیفائی کرلیا۔

دبئی میں جاری ایونٹ کے سیمی فائنل میں پاکستان انڈر19 کے بولرز نے شاندار پرفارمنس کا مظاہرہ کیا، دوسرے اوور سے حریف ٹیم کی وکٹیں گرانا شروع کیں، 70 رنز پر 8 کھلاڑیوں کو پویلین پہنچادیا۔

سری لنکا کے یاسیرو روڈریگو اور پتھیرانا متھیشا کے 31، 31 رنز کی بدولت سری لنکن ٹیم 147 کے مجموعے تک پہنچنے میں کامیاب ہوئی۔ 

پاکستان کی جانب سے ذیشان ضمیر نے 4 احمد خان اور اویس علی نے 2، 2 کھلاڑیوں کو آؤٹ کیا۔

جواب میں پاکستان انڈر19 ٹیم شروع ہی سے مشکل میں گھر گئی جہاں اس کی 10 رنز پر ہی 3 وکٹیں گر گئیں اور پھر پوری ٹیم 125 رنز پر ڈھیر ہوگئی جبکہ محمد شہزاد 30 اور احمد خان 36 رنز کے ساتھ نمایاں رہے۔

سری لنکا کی جانب سے تری وین میتھیو نے 4 وکٹیں حاصل کیں۔

سری لنکا کی ٹیم 22 رنز کی فتح کے ساتھ فائنل میں پہنچ گئی، جہاں اس کا مقابلہ بھارت سے ہوگا۔

بشکریہ جنگ