انقلاب آج اکیلا ہیلی کاپٹر پر بنی گالا پہنچ گیا، رانا ثنااللّٰہ
وفاقی وزیر داخلہ رانا ثنااللّٰہ کا کہنا ہے کہ شکر ہے انقلاب آج پشاور سے خیبرپختونخوا حکومت کے ہیلی کاپٹر پر اکیلا بنی گالا پہنچ گیا، بھگوڑے کو سرکاری ہیلی کاپٹر پر بنی گالہ واپس آتے ہی جھوٹ کا نیا دورہ پڑگیا۔
پاکستان تحریک انصاف (پی ٹی آئی) کے رہنما شاہ محمود قریشی کے بیان پر ردِعمل دیتے ہوئے وزیر داخلہ رانا ثنا نے کہا کہ بےگناہ پولیس اہلکار کی شہادت کے ذمہ داروں، اسلحہ، گولہ بارود کوئی سیاسی رد عمل نہیں، آپ گولیاں برسائیں، ڈنڈے چلائیں، آگ لگائیں، ہم تماشائی بن کر دیکھیں، یہ نہیں ہوسکتا، قانون اور قاعدے پر سختی سے عمل ہوگا، قانون کی خلاف ورزی کریں گے نہ ہی کرنے دیں گے۔
وزیر داخلہ نے کہا کہ 25 مئی کو جو ڈر کر چھپ گئے تھے، اب بلوں سے باہر نکل آئے ہیں، 11 دن پہلے کوئی نکلا نہ اب کوئی نکلے گا، جن کا مال کھایا ہے وہ البتہ وصولی کے لیے بنی گالہ ضرور آسکتے ہیں۔
رانا ثنااللّٰہ نے کہا کہ عوام نے آپ کو مسترد کر کے اپنا عوامی ردِ عمل دے دیا ہے، عوام نے بھگوڑوں کے خلاف ردِ عمل دے دیا ہے۔
وزیر داخلہ نے کہا کہ جس کے بولنے اور کھلے رہنے سے ہمیں فائدہ ہو اُس کی گرفتاری میں وقت ضائع نہیں کرنا چاہتا، جو بھی قانون توڑے گا قانون کی گرفت میں آئے گا۔
Comments are closed.