انضمام الحق کے استعفے پر ظہیر عباس کا مؤقف سامنے آگیا

پاکستان کرکٹ ٹیم کے ماضی کے اسٹار بیٹر ظہیر عباس نے کہا ہے کہ ورلڈ کپ کے موقع پر چیف سلیکٹر کو استعفیٰ نہیں دینا چاہیے تھا۔

ظہیر عباس نے کہا ہے کہ دنیا میں ایسی مثال نہیں ملتی کہ ٹیم ورلڈ کپ کھیلنے گئی ہو اور کسی نے استعفیٰ دیا ہو۔

سابق کرکٹر کا کہنا ہے کہ پاکستان ٹیم کی پرفارمنس بھارت سے ہارنے کے بعد گر گئی، ڈیپارٹمنٹل کرکٹ بہت ضروری تھی، اسے تباہ کر دیا گیا ہے۔

پاکستان کرکٹ ٹیم کے سابق چیف سلیکٹر انضمام الحق کے استعفے اور تحقیقات کے معاملے پر تحقیقاتی کمیٹی نے آج سے کام کا آغاز کردیا۔

انہوں نے مزید کہا کہ آرگنائزر کو کرکٹ کی سمجھ نہیں پھر رزلٹ تو یہی آئے گا، کرکٹ منظورِ نظر لوگوں کے ہاتھ میں ہو گی تو نقصان ہوتا رہے گا۔

ظہیر عباس کا یہ بھی کہنا ہے کہ لوگ کرکٹ کے پیچھے پڑے ہیں کہ اسے تباہ کر دیا جائے، خدا کے واسطے کرکٹ اسپورٹس مین کو دو۔

بشکریہ جنگ