امریکن ائیرلائن کے مسافر نے جہاز کے عملے کو مکا رسید کر دیا

امریکن ائیر لائن میں سوار ایک مسافر نے جہاز کے عملے سے تلخ کلامی کے بعد ایک اہلکار کو مکا ماردیا۔

غیر ملکی میڈیا کے مطابق مسافر کی جانب سے جہاز کے عملے کو مکا مارنے کا واقعہ امریکن ائیرلائن کی فلائٹ 377 میں پیش آیا۔

جہاز نے میکسیکو میں لاس کیبوس سے لاس اینجلس کے لیے اڑان بھری تھی کہ دوران پرواز مسافر کی جانب سے عملے کو مکا مارا گیا۔

جہاز میں موجود ایک مسافر کی جانب سے مسافر کی عملے سے بدتمیزی کی ویڈیو سوشل میڈیا پر بھی وائرل ہو رہی ہے، ویڈیو میں دیکھا جا سکتا ہے کہ پہلے مسافر اور عملے کے درمیان تلخ کلامی ہوتی ہے اور پھر مسافر پیچھے سے آتے ہوئے عملے کو مکا مار دیتا ہے۔

امریکن ائیرلائنز کے مطابق مسافر کو لاس اینجلس میں لینڈ ہوتے ہی قانون نافذ کرنے والے ادارے کی جانب سے گرفتار کر لیا گیا جبکہ ائیر لائن کی جانب سے مسافر پر تاحیات پابندی بھی لگا دی گئی ہے۔

بشکریہ جنگ