امریکا: 16 سالہ نوجوان نے گولڈن گیٹ برج سے چھلانگ لگا کر خودکشی کرلی

بھارتی نژاد امریکی نوجوان نے سان فرانسسکو کے مشہور گولڈن گیٹ برج سے چھلانگ لگا کر خودکشی کرلی۔

غیر ملکی میڈیا رپورٹس کے مطابق نوجوان کے والدین اور امریکی کوسٹل گارڈز نے تصدیق کرتے ہوئے بتایا ہے کہ 16 سالہ نوجوان کی سائیکل، فون اور بیگ گولڈن گیٹ برج سے برآمد ہوئی ہے.

انہوں نے بتایا کہ خیال کیا جاتا ہے کہ نوجوان نے تقریباً شام 5 بجے پل سے چھلانگ لگائی ہوگی، نوجوان بارہویں جماعت کا طالب علم تھا۔

کوسٹل گارڈز کا کہنا ہے کہ انہوں نے نوجوان کو پل سے چھلانگ لگاتے ہوئے دیکھا تھا جس کے فوری بعد دو گھنٹے کا سرچ آپریشن کیا، لیکن نوجوان کے زندہ بچنے کے بہت کم امکانات ہیں۔

کمیونٹی لیڈر اجے جین بھٹوریہ کا کہنا ہے کہ یہ چوتھا واقعہ ہے جس میں بھارتی نژاد امریکی نوجوان نے گولڈن برج سے چھلانگ لگاکر خودکشی کی کوشش کی ہے۔

واضح رہے کہ گولڈن گیٹ برج سے خود کشی کے بڑھتے ہوئے واقعات کی روک تھام کرنے والی تنظیم برج ریل فاونڈیشن کے مطابق گزشتہ ایک سال کے دوران 25 افراد نے پل سے چھلانگ لگا کر خودکشی کی ہے جبکہ 1937 سے اب تک تقریباً 2 ہزار کیسز رپورٹ ہوئے ہیں۔

بشکریہ جنگ