الیکشن کمیشن کے فیصلے پر ترجمان ایم کیو ایم پاکستان کا ردِعمل
الیکشن کمیشن کے فیصلے پر ترجمان ایم کیو ایم پاکستان نے ردِعمل کا اظہار کیا ہے۔
ترجمان ایم کیو ایم کا کہنا ہے کہ الیکشن کمیشن نے انصاف کے تقاضوں کو پورا نہیں کیا۔
ترجمان ایم کیو ایم کا کہنا ہے کہ غیر جانبدارانہ بلدیاتی انتخابات کا انعقاد ہی الیکشن کمیشن کی واحد ذمے داری ہے لیکن الیکشن کمیشن نے سندھ میں اپنی یہ ذمے داری پوری نہیں کی۔
ترجمان کے مطابق الیکشن کمیشن نے تمام قانونی تقاضوں کو پس پشت ڈال کر جعلی حلقہ بندیاں کی ہیں، جس سے شہری سندھ کی ایک چوتھائی آبادی حقیقی نمائندگی سے محروم رہ گئی ہے۔
ترجمان نے کہا کہ مہاجروں اور سندھ کے شہری علاقوں کی نمائندگی جعلی طریقے سے چھیننے کی سازش کی گئی ہے۔
ترجمان ایم کیو ایم کا کہنا ہے کہ جس الیکشن میں جعلی حلقہ بندیوں اور جعلی ووٹرلسٹ کے ذریعے دھاندلی ہوچکی ہو اس کو تسلیم نہیں کیا جائے گا۔
ترجمان نے کہا کہ یہ واضح ہوگیا کہ الیکشن کمیشن انتخابات سے قبل دھاندلی نہیں رکواسکا اور یہ سوالیہ نشان اس کی شفافیت پر لگا رہے گا۔
ترجمان کا مزید کہنا ہے کہ ہم الیکشن کمیشن کے اس متعصبانہ فیصلے کے خلاف عدالت سمیت تمام دروازے کھٹکھٹائیں گے، ہم دیکھنا چاہتے ہیں کہ شہری سندھ کو کہاں کہاں انصاف سے محروم رکھا جاتا ہے۔ عدالتوں سے انصاف نہ ملا تو عوامی عدالتیں فیصلہ کریں گی۔
Comments are closed.